अमरावतीत गुंडाराज ; दिवसाढवळ्या बार समोर तरुणावर प्राणघातक हल्ला

नवसारी परिसरात असलेल्या यश बार समोर सहाजणांनी एका तरूणाला मारहाण केली. आरोपींनी तरुणाला इतकी मारहाण केली की तो काही वेळ मरणासन्न अवस्थेत खाली पडला होता. या हल्ल्यात जखमी झालेल्या भूषणवर रुग्णालयात उपचार सुरू आहेत.

अमरावती - शहरातील अचलपूर रस्त्यावरील नवसारी परिसरात असलेल्या यश बार समोर सहाजणांनी एका तरूणाला मारहाण केली. भूषण पोहकर(वय २१), असे मारहाण झालेल्या तरूणाचे नाव आहे. आरोपींनी जुन्या वादातून भूषणला लोखंडी रॉड, काठ्या, चाकू आणि लाथा-बुक्क्यांनी मारहाण केली. या प्राणघातक हल्ल्याची संपूर्ण घटना सीसीटीव्हीत चित्रित झाली आहे. याप्रकरणी गाडगेनगर पोलिसांनी सहा पैकी पाच आरोपींना अटक केली आहे.

अमरावती शहरासह जिल्ह्यात मागील काही दिवसांत हत्येच्या घटनांमध्ये वाढ झाली आहे. २७ तारखेला अमरावती शहरातील नवसारी परिसरातील यश बार समोर तरुणाला मारहाणीची घटना घडली. आरोपींनी तरुणाला इतकी मारहाण केली की तो काही वेळ मरणासन्न अवस्थेत खाली पडला होता. या हल्ल्यात जखमी झालेल्या भूषणवर रुग्णालयात उपचार सुरू आहेत. या प्रकारानंतर अमरावती शहराच्या कायदा आणि सुव्यवस्थेवर प्रश्नचिन्ह उपस्थित झाले आहे.

हेही वाचा -MIDC वर हॅकर्सचा डोळा? हॅकर्सने केली तब्बल ५०० कोटींची मागणी