अमरावती - शहरातील नागपुरीगेट पोलीस ठाण्याच्या हद्दीत इक्बाल चौकात दोन चारचाकी वाहनातून भर दिवसा अवैध पद्धतीने गांजाची तस्करी होत असल्याचा धक्कादायक प्रकार उघडकीस आला आहे. या कारवाईत शहर पोलिसांनी तब्बल 366 किलो गांजासह दोन आरोपींना अटक केली आहे. शिवाय दोन वाहन जप्त केले असून हा गांजा 46 लाखांचा असल्याची माहिती पोलिसांनी दिली आहे. तर भर दिवसा होणारी गांजाची तस्करी त्यामुळे पोलीस वर्तुळात खळबळ उडाली आहे. अमरावतीच्या पोलीस आयुक्त आरती सिंग यांनी घटनास्थळी जाऊन घटनेची माहिती घेत तपास सुरू केला आहे.
अमरावती गुन्हे शाखेचे पथक गस्तीवर असताना दोन चारचाकी वाहनांमधून मोठ्या प्रमाणात गांजा तस्करी होत असल्याची गुप्त माहिती पोलिसांना मिळाली होती. त्याआधारे पोलिसांनी सापळा रचत ही कारवाई केली आहे. एम एच 31 सी आर 4494 लोगन कार, एम एच तीस 1968 असेंट कारमध्ये 36 लाख 41 हजार रुपये किमतीचा 366 किलो गांजा जप्त केला आहे. शिवाय दहा लाख किमतीच्या दोन कार असा एकूण 46 लाख 1 हजार रुपयाचा मुद्देमाल जप्त करण्यात आला आहे. या प्रकरणी पोलिस आरोपींचा तपास करीत आहे. शहर व जिल्ह्यामध्ये अवैध धंद्याची वाढलेले जाळे उद्ध्वस्त करण्याचा पोलीस विभागातर्फे प्रयत्न सुरू आहे. यासाठी पोलीस आयुक्त आरती सिंग यांच्या मार्गदर्शनाखाली विशेष पथक तयार करण्यात आले आहेत.
