'सरकारची निर्णय क्षमता संपली, सरकारच्या निर्णयाचा धिक्कार'

कोरोनाच्या या काळात राज्यातील शाळाही बंद आहेत. शाळा सुरू करायची की नाही याबाबत मंत्री मंडळाच्या बैठकीत निर्णय न घेता राज्य शासन हा निर्णय जिल्ह्यांवर ढकलते, याचा धिक्कार वंचित बहुजन आघाडीचे नेचे अॅड. प्रकाश आंबेडकर यांनी केला आहे.

अकोला- देश पातळीवर राजकीय नेतृत्व नाही हे आता कोरोनाच्या पार्श्वभूमीवर दिसून आले आहे. तीच गत महाराष्ट्राचीही झाली आहे. केंद्र आणि राज्य सरकार एकमेकांवर निर्णय ढकलून मोकळे होतात. आता शाळेबाबतही राज्य शासन निर्णय शाळांवर ढकलून मोकळे झाले, अशा निर्णयाचा आम्ही धिक्कार करतो, अशा शब्दात वंचित बहुजन आघाडीचे नेते प्रकाश आंबेडकर यांनी केंद्र आणि राज्य सरकारच्या निर्णयाचा समाचार घेतला.

राज्यात शाळा सुरू करायच्या की नाही हा प्रश्न गेल्या काही दिवसांपासून अधांतरी होता. मात्र, मुख्यमंत्र्यांनी हा निर्णय जिल्हा पातळीवर ढकलून दिला. याचाच अर्थ यांच्यात निर्णय घेण्याची क्षमता नाही. राजकीय नेतृत्व नाही, दूरदृष्टी नाही आणि बेभरवशावर हे राज्य सोडून दिले आहे. ही अवस्था 'जाणता राजा'ची पण असल्याची खरमरीत टीका प्रकाश आंबेडकर यांनी केली.

केंद्रात मोदी नेतृत्व करू शकत नाही ते निर्णय घेऊ शकत नाही, आपले निर्णय राज्यावर सोडून देतात आणि राज्यातील लोकही जिल्ह्यावर निर्णय सोडून देतात. हे आजच्या निर्णयावरून दिसून आले. अशा निर्णयाचा आम्ही धिक्कार करतो. शासनाला आमची विनंती आहे की, शाळा सुरू करायच्या की नाही हा निर्णय लवकर घ्या, नाही करायच्या असतील तर तसे स्पष्ट सांगा आणि करायच्या असतील तर केव्हा करणार, याचे वेळापत्रक जाहीर करा, वेळापत्रक जाहीर करताना जर तरची भाषा वापरायची नाही, असेही प्रकाश आंबेडकर यांनी सांगितले.

हेही वाचा -शेतकऱ्यांच्या विजे संदर्भातील तक्रारी तातडीने सोडवाव्यात; आमदार नितीन देशमुखांच्या अधिकाऱ्यांना सुचना