सातपुड्याच्या पायथ्याशी असलेल्या पठार नदीच्या डोहात बुडून दोघांचा मृत्यू

अकोला जिल्ह्यातील खटकाली गावाजवळ अकोट येथील इफ्तेखार प्लॉटमधील राहणारे दोन युवक हे पठार नदीच्या डोहात पोहण्यासाठी गेले होते. मात्र, पाण्याचा अंदाज न आल्याने त्यांच्या पाण्यात बुडून मृत्यू झाला. त्यांचे मृतदेह अकोट ग्रामीण रुग्णालयात शवविच्छेदनासाठी आणले होते. त्यावेळी त्यांना पाहण्यासाठी बघ्यांची गर्दी झाली होती.

अकोला - खटकाली गावाजवळ अकोट येथील इफ्तेखार प्लॉटमधील राहणारे दोन युवक हे पठार नदीच्या डोहात पोहण्यासाठी गेले होते. त्यांना पाण्याचा अंदाज न आल्याने त्यांचा मंगळवारी (दि. 21 सप्टेंबर) दुपारी बुडून मृत्यू झाला. शेख मोईन शेख अमीन (वय 19 वर्षे), शेख सुफियान शेख हमीद (वय 18 वर्षे), अशी त्यांची नावे आहेत.

अकोट शहरातील इफ्तेखार प्लॉट येथील दोघे हे पोहण्यासाठी खटकाली परिसरातील पठार नदीच्या डोहातील नदीपात्रात गेले. मात्र, त्यांना पाण्याचा अंदाज आला नाही. बराच वेळ झाल्यानंतरही ते पाण्याच्या बाहेर न आल्याने सोबतच्या मित्रांनी आरडाओरडा केला. त्या ठिकाणी असलेल्या काहींनी त्यांचा पाण्यात शोध घेतला. काही वेळाने त्यांचे मृतदेह बाहेर काढण्यात आले.

त्यांचे मृतदेह अकोट ग्रामीण रुग्णालयात शवविच्छेदनासाठी आणले होते. त्यावेळी त्यांना पाहण्यासाठी बघ्यांची गर्दी झाली होती. यावेळी पोलिसांचा बंदोबस्त होता. मात्र, गर्दी जास्त प्रमाणात असल्याने मुख्यालयातील पोलिसांचा फौजफाटा बोलावण्यात आला होता. या घटनेमुळे खळबळ उडाली असून परिसरात हळहळ व्यक्त केली जात आहे.

हेही वाचा -अकोला शहराला पाणीपुरवठा करणारी मुख्य पाईपलाईन फुटली; लाखो लिटर पाणी वाया