प्रकाश आंबेडकर यांच्या जिनिंग फॅक्टरीला आग; कोट्यवधींचा कापूस जळून खाक

अकोला पातूर रोडवरील चिखलगाव येथील सम्यक जिनिंग-प्रेसिंग फॅक्टरीला आग लागली. या फॅक्टरीमध्ये 48 स्पिन मशीनवर काम सुरू होते. कापूस वाहक पट्ट्यावर घर्षण होऊन ठिणगी उडाल्याने आग लागली असावी, असा अंदाज व्यवस्थापक भारती इंगळे तथा जिल्हा उपनिबंधक डॉ. प्रवीण लोखंडे यांनी व्यक्त केला आहे.

अकोला - वंचित बहुजन आघाडीचे अध्यक्ष प्रकाश आंबेडकर यांची चिखलगाव येथे सम्यक जिनिंग अँड प्रेसिंग फॅक्टरी आहे. या फॅक्टरी ला मंगळवारी सकाळी आग लागली. या आगीमध्ये लाखो रुपयांचा कापूस जळून खाक झाला आहे. ही आग नेमकी लागली कशामुळे हे अद्याप कळू शकले नाही. आग लागल्यानंतर काम करणारे मजूर पळून गेल्याने सुदैवाने कुठलीही जीवितहानी झाली नाही. अग्निशामक दलाने प्रयत्न करीत आग आटोक्यात आणली.

अकोला पातूर रोडवरील चिखलगाव येथील सम्यक जिनिंग-प्रेसिंग फॅक्टरीला आग लागली. या फॅक्टरीमध्ये 48 स्पिन मशीनवर काम सुरू होते. कापूस वाहक पट्ट्यावर घर्षण होऊन ठिणगी उडाल्याने आग लागली असावी, असा अंदाज व्यवस्थापक भारती इंगळे तथा जिल्हा उपनिबंधक डॉ. प्रवीण लोखंडे यांनी व्यक्त केला आहे. यासंदर्भात सीसीआयचे महाव्यवस्थापक अजय कुमार यांनी दिलेल्या माहितीनुसार चार हजार क्विंटल कापूस, 2000 क्विंटल सरकी आणि 50 ते 60 कापसाच्या गठाणी आगीच्या भक्ष्यस्थानी पडल्या असाव्या, असा प्राथमिक अंदाज त्यांनी व्यक्त केला. सम्यक जिनिंग प्रेसिंग फॅक्टरीमधून प्रचंड प्रमाणात धूर निघत होता. आग विझविण्याचे काम पातुर नगरपरिषदेचा एक बंब आणि अकोला महानगरपालिकेच्या दोन बंबांनी आग विझविण्यास सुरुवात केली. सहकारी तत्त्वावरील सम्यक जिनिंग-प्रेसिंग हे अकोला जिल्ह्यातील सर्वात मोठे युनिट होते. या ठिकाणी दहा ते अकरा हजार क्विंटलहून अधिक कापसाची खरेदी करण्यात आली होती. या फॅक्टरीला आग लागल्यामुळे येथील खरेदी आजपासून थांबली आहे. त्यामुळे कापूस खरेदीचा ताण अधिक वाढणार असल्याची माहिती जिल्हा उपनिबंधक डॉ. प्रवीण लोखंडे यांनी दिली. घटनेची माहिती समजताच सम्यक जिनिंग-प्रेसिंगचे अध्यक्ष प्रकाश आंबेडकर यांनी भेट देऊन पाहणी केली.