अकोला- आगामी उत्सवांमध्ये शांतता भंग होऊ नये, यासाठी पोलीस दलाकडून विविध उपक्रम राबविण्यात आले आहेत. शांतता समिती सदस्यांच्या बैठका घेऊन उपाययोजना करण्यात आल्या आहेत, अशी माहिती पोलीस अधीक्षक जी. श्रीधर यांनी आज पत्रकार परिषदेत दिली. तसेच ईद-ए-मिलाद संदर्भात शासनाने दिलेल्या नियमानुसारच हा सण साजरा करण्याचे आवाहनही त्यांनी यावेळी केले.
शहर वाहतूक शाखेकडून राबविण्यात येणारे उपक्रम हे योग्य पद्धतीने सुरू असल्याचे कौतुकही पोलीस अधीक्षक जी. श्रीधर यांनी केले. तपासाच्या दृष्टिकोनात स्थानिक गुन्हे शाखा, विशेष पथक यांच्याकडूनही वेळोवेळी कारवाई होत आहे. टोळी गुन्हेगारीवर लक्ष केंद्रित करून अशा गुन्हेगारांना जिल्ह्यातून हद्दपार करण्यात आले आहे. यामुळे जिल्ह्याचा गुन्हेगारीचा आलेख कमी होईल, असेही पोलीस अधीक्षक श्रीधर यांनी यावेळी सांगितले. या पत्रकार परिषदेला अपर पोलीस अधीक्षक मोनिका राऊत, स्थानिक गुन्हे शाखेचे पोलीस निरीक्षक शैलेश सपकाळ हे उपस्थित होते.
