लहानग्यांसोबत अधिकाऱ्यांनीही घेतले गणपती बनवण्याचे प्रशिक्षण

अकोला येथे अखिल भारतीय क्षत्रिय महासभेतर्फे शाडू मातीचे गणपती बनवण्याचे प्रशिक्षण आयोजित केले होते. विद्यार्थ्यांसोबत जिल्हाधिकारी व पोलीस अधीक्षक यांनीही गणपती बनवण्यात सहभाग घेतला.

अकोला - अखिल भारतीय क्षत्रिय महासभेतर्फे शाडू मातीचे गणपती बनवण्याचे प्रशिक्षण घेण्यात आले. या प्रशिक्षणात दोन हजार विद्यार्थी सहभागी झाले होते. विद्यार्थ्यांसोबत जिल्हाधिकारी व पोलीस अधीक्षक यांनीही गणपती बनवण्यात सहभाग घेतला.

पर्यावरणपूरक गणपती बसवण्यात यावे, असा आग्रह पर्यावरण प्रेमी आणि शासनाकडून करण्यात येतो. यासाठी जनजागृतीच्या उद्देशाने अखिल भारतीय क्षत्रिय महासभेने शाडू मातीचे गणपती बनवण्याचे प्रशिक्षण आयोजित केले होते. हे प्रशिक्षण डॉ. पंजाबराव देशमुख कृषी विद्यापीठाच्या पदवीदान सभागृहात झाले. प्रशिक्षणाच्या कार्यक्रमात पालकमंत्री डॉ. रणजित पाटील, आमदार रणधीर सावरकर, आमदार गोपीकिशन बाजोरिया, महापौर विजय अग्रवाल, जिल्हाधिकारी जितेंद्र पापळकर, माजी आमदार हरिदास भदे, माजी आमदार दिलीप सानंदा, नगरसेवक राजेश मिश्रा, महासभेचे अजय सेंगर हे उपस्थित होते.

यावेळी पालकमंत्री डॉ.पाटील यांनी विद्यार्थ्यांना मार्गदर्शन केले. प्रशिक्षक शरद कोकाटे यांनी विद्यार्थ्यांसोबत जिल्हाधिकाऱ्यांनाही गणपती बनवण्याचे प्रशिक्षण दिले. जिल्हाधिकारी जितेंद्र पापळकर यांनी शाडू मातीचा गणपती बनवला. पोलीस अधीक्षक अमोघ गावकर अणि त्यांची पत्नी भूमिका गावकर यांनीही या कार्यशाळेला भेट दिली. यावेळी अखिल भारतीय क्षत्रिय महासभेचे पदाधिकारी आणि कार्यकर्ते मोठ्या संख्येने उपस्थित होते.