घरात अन्नाचा कण नाही... हजार रुपयांसाठी माय-लेकीची 20 किलोमीटर पायपीट!

२० दिवसांनंतर पुन्हा लॉकडाऊन वाढवण्यात आल्याने हातावर पोट असणाऱ्या अनेक कुटुंबांच्या उदरनिर्वाहाचा प्रश्न गंभीर होत चालला आहे. याची तीव्रता सांगणारा प्रकार अकोल्यात घडला. तुलंगा गावातील एक महिला आणि तिची मुलगी मुलीच्या खात्यात जमा झालेले एक हजार रुपये काढण्यासाठी २० किमी पायी चालत गेल्या.

अकोला - कोरोनाचा प्रादुर्भाव वाढू नये यासाठी शासनाने ‘लॉकडाऊन’ केले आहे. २० दिवसांनंतर पुन्हा लॉकडाऊन वाढवण्यात आल्याने हातावर पोट असणाऱ्या अनेक कुटुंबांच्या उदरनिर्वाहाचा प्रश्न गंभीर होत चालला आहे. याची तीव्रता सांगणारा प्रकार अकोल्यात घडला. तुलंगा गावातील एक महिला आणि तिची मुलगी मुलीच्या खात्यात जमा झालेले एक हजार रुपये काढण्यासाठी २० किमी पायी चालत गेल्या.

लॉकडाऊन वाढल्याने ग्रामीण भागातील मजुरांवर उपासमारीची पाळी आली आहे. चार दिवसांपासून मोफत मिळालेल्या तांदळावर दिवस काढत असलेल्या तुलंगा येथील आशाबाई वाघमारे यांच्या मुलीच्या खात्यात विद्यार्थिनी प्रोत्साहन भत्त्याचे एक हजार रुपये जमा झाले. घरात अन्नाचा कणही नसल्याने आशाबाई १२ वर्षीय मुलीला घेऊन शुक्रवारी सकाळी वाडेगावला जाण्यासाठी निघाल्या. तुलंगा बसस्थानकावर वाहन नसल्याने दोघींनी पायीच वाडेगाव गाठण्याचा निर्णय घेतला.

भर उन्हात दीड ते दोन तास पायपीट केल्यानंतर त्या वाडेगाव येथील बँकेत पोहोचल्या. तिथे एक तास रांगेत ताटकळल्यानंतर मुलीच्या खात्यावर जमा झालेले हजार रुपये त्यांना मिळाले. या पैशातून त्यांनी तीन किलो गहू, काही समान घेऊन भर उन्हात पुन्हा तुलंगागावाकडे पायी प्रवास सुरू केला.

२० किलोमीटरचा प्रवास करता-करता त्या मुलीला तहान आणि भूक लागली. 'आई माझे पाय दुखत आहेत', अशी आर्त हाक मुलगी आईला देत होती. 'चल आता लवकर जाऊ घरी', असा धीर देत आईने मुलीला किलोमीटर दिग्रसपर्यंत आणले. ही बाब रस्त्याने जात असलेल्या प्रशिस विष्णू सदार या मुलाच्या निदर्शनास आली. त्याने महिला आणि तिच्या मुलीला जेवणाचा डबा दिला. या महिलेच्या घरी म्हातारी आई आणि एक लहान मुलगा आहे.