अकोला - कृषी नगरातील पंचशील नगर येथे आदर्श बुद्धविहार बाजूला असलेल्या घरात सिलिंडरचा स्फोट झाला. या घटनेमध्ये सुदैवाने कुठलीही जीवित हानी झाली नाही. अग्निशमन दलाने वेळीच घरात भरलेले दुसरे सिलिंडर बाहेर काढल्याने मोठा अनर्थ टळला. रविवारी रात्री दहाच्या सुमारास ही घटना घडली.
पंचशील नगरातील आदर्श बुध्दविहारच्या बाजुला राहणारे प्रल्हाद हिवराळे यांच्या घरी सिलिंडरचा स्फोट झाला. यामुळे घराला आग लागली. या आगीत घरातील साहित्य जळून खाक झाल्याची माहिती मिळत आहे. दरम्यान घटनेची माहिती मिळताच, अग्निशमन दलाने तातडीने घटनास्थळी धाव घेतली आणि तातडीने आग विझविण्यासाठी प्रयत्न सुरू केले.