दहशतवादविरोधी पथकाने जुगारींवर कारवाई करत जप्त केला मुद्देमाल

आठ तलवार, भाले, चाकू आणि कुऱ्हाड असा शस्त्रांचा साठा जप्त करीत दहशतवादविरोधी पथकाने जुगारासोबतच एक लाख 77 हजारांचा मुद्देमाल जप्त केला आहे. या सर्वांवर रामदास पेठ पोलीस ठाण्यात गुन्हा दाखल करण्यात आला आहे.

अकोला - जुगाराच्या छाप्यात शस्त्राचा साठा मिळून आल्याने पोलीसही चक्रावून गेले आहेत. आठ तलवार, भाले, चाकू आणि कुऱ्हाड असा शस्त्रांचा साठा जप्त करीत दहशतवादविरोधी पथकाने जुगारासोबतच एक लाख 77 हजारांचा मुद्देमाल जप्त केला आहे. या सर्वांवर रामदास पेठ पोलीस ठाण्यात गुन्हा दाखल करण्यात आला आहे.

घरात जुगाराचा क्लब

पोलीस अधीक्षक जी. श्रीधर यांच्या दहशतवादविरोधी पथकाने माहितीच्या आधारावर दीपक चौक येथील सितु वर्मा याने आपले घरात जुगाराचा क्लब भरविलेला असून तो पैशांची बाजी लावून 52 तास पत्त्यावर जुगार खेळवित आहे, अशी माहिती मिळाली. त्या माहितीच्या आधारावर दहशतवादविरोधी पथकाचे प्रमुख पोलीस निरीक्षक विलास पाटील यांनी पथकासह छापा टाकला. या कारवाईत पाच जण मिळून आले. पथकाने एकूण एक लाख 77 हजार 200 रूपयांचा ऐवज जप्त केला आहे.

विविध कलमांतर्गत गुन्हा

यामध्ये पथकाने सितु सुराजलाल वर्मा, चंद्रकुमार अमरीश पटेल, जय मुकराम पटेल, दीपक प्रकाश शुक्ला, गजानन दयाराम राठोड यांना अटक केली आहे. आरोपींविरुद्ध जुगार प्रतिबंधक कायद्याचे कलम 4, 5 व भारतीय हत्यार कायद्याचे कलम 4, 25, मुंबई पोलीस कायद्याचे कलम 135 अन्वये पो. स्टे. रामदासपेठ येथे गुन्हा नोंद केले आहे.

अशी मिळाली शस्त्रे

त्यांच्याजवळ नगदी 12 हजार 200 रुपये, तीन मोबाइल किंमत 30 हजार रुपये, तीन दुचाकी किंमत एक लाख रुपये, जुगाराचे टेबल व खुर्च्या किंमत 15 हजार रुपये त्याचप्रमाणे आठ लोखंडी तलवारी, फरशी कुऱ्हाडी चाड, रामपुरी चाकू दोन, सिंघल भाले तीन, फर्शी भाले पाच असे 20 हजार रूपयांची शस्रे मिळून आलीत.