संगमनेर (अहमदनगर) - तालुक्यातील पुणे-नाशिक राष्ट्रीय महामार्गावरील माहुली येथील नवीन घाटात मालवाहू ट्रक पलटी झाल्याची घटना आज दुपारी पावणेदोनच्या सुमारास घडली. त्यामुळे काही वेळ महामार्ग बंद होता. तर, सर्व वाहतूक ही जुन्या एकेरी घाटाने वळवण्यात आली होती.
संगमनेरमधील माहुली घाटात ट्रक पलटी
मालवाहू ट्रक क्रमांक जीजे ०३ बी. डब्लू. ५५०५ वरील चालक विनोद गिरी गोस्वामी हे राजकोट येथून नामांकित कंपनीच्या वाहनांचे सुटे भाग घेऊन नाशिक येथून संगमनेरमार्गे पुणेच्या दिशेने जात होते. रविवारी दुपारी हा मालवाहू ट्रक पुणे नाशिक राष्ट्रीय महामार्गावरील माहुली नवीन घाटात आला असता, चालकाचा ताबा सुटल्याने हा ट्रक महामार्गावर पलटी झाला. याबाबतची माहिती महामार्ग पोलिसांनी दिली आहे. त्यामुळे ट्रकमध्ये असलेली वाहनांच्या सुट्या भागांची खोकी महामार्गावर पडली होती.