अहमदनगर - पारनेर तालुक्यातल्या भाळवणीच्या वीज वितरण कंपनीच्या उपकेंद्रातल्या सहायक अभियंत्याला ४ हजार रुपयांची लाच घेतल्याप्रकरणी पोलिसांनी ताब्यात घेतलं आहे. भाऊसाहेब गोविंद पगारे असं त्याचं नाव असून अहमदनगरच्या लाचलुचपत विभागाने ही कारवाई केली. यापूर्वीही 2004साली पगारे याला लाच घेतल्याप्रकरणी कारवाईला सामोरे जावे लागले होते.
पारनेर तालुक्यातल्या जामगावच्या कैलास अण्णासाहेब शिंदे यांनी फेब्रुवारी २०२०मध्ये पोल्ट्री फार्मच्या वीज कनेक्शनसाठी कोटेशन भरले होते. मात्र, कोटेशन मंजूर होऊनही सहायक अभियंता पगारे यांनी केवळ पैशासाठी त्यांना वीजमीटर दिले नाही. त्यामुळे मीटरच्या मागणीसाठी कैलास शिंदे यांनी आज पगारे यांची भेट घेतली. त्यावेळी मीटर देण्यासाठी ५ हजार रुपयांची मागणी पगारे यांनी शिंदे यांच्याकडे केली. परंतू हा व्यवहार ४ हजार रुपयांवर ठरला. तत्पूर्वी शिंदे यांनी अहमदनगरमधील लाचलुचपत विभागाला याबाबत माहिती दिली.