अहमदनगर- दहा कोटीच्या खंडणीसाठी संगमनेरमधून शाळकरी मुलाचे अपहरण केल्याचे उघड झाले आहे. अपहरण केल्यानंतर अपहरणकर्त्यांनी कापड व्यावसायिक असलेल्या मुलाच्या वडिलांना फोन करुन खंडणीची मागणी केली. मात्र, पोलिसांनी वेगाने तपास करत अपहरणकर्त्यांचा माग काढल्याने त्यांनी मुलाला शहराजवळील खेड्यात सोडून दिले. पोलिसांनी याप्रकरणी तिघा संशयितांना ताब्यात घेतले आहे.
घटनेविषयी माहिती सांगताना पोलीस अधिकारी संगमनेर येथील कटारिया क्लॉथचे संचालक मनोज कटारिया यांचा मुलगा दक्ष (वय-१२ वर्ष) हा ध्रुव ग्लोबल स्कूलमध्ये शिकण्यास आहे. सकाळी तो नेहमी प्रमाणे शाळेत जाण्यासाठी घराबाहेर पडला होता. घरापासून काही अंतरावर स्कूलबसची वाट पाहत असताना इंडिका कारमधून आलेल्या अपहरणकर्त्यांनी त्याला उचलून इंडिकामध्ये टाकत तेथून पलायन केले.
काही वेळानंतर अपहरणकर्त्यांनी मुलाच्या पालकांना फोन करत अपहरण केल्याचे सांगितले. घाबरलेल्या पालकांनी शाळेत आणि बसचालकाकडे चौकशी केली असता मुलगा शाळेत पोहचला नसल्याचे उघड झाले. त्यानंतर त्यांनी पोलिसांकडे धाव घेत पोलिसांना घडलेला प्रकार सांगितला.
अपहरणकर्त्यांनी मेसेजद्वारे कटारीया यांच्याकडे दहा कोटीची खंडणीची मागणी केली होती. पोलिसांनी घटनेचे गांभीर्य लक्षात घेत तातडीने तपास सुरू केला. पोलिसांना मिळालेली माहिती आणि सीसीटीव्ही पुटेजच्या आधारे पोलिसांनी शोध सुरू केला. पोलीस संशयितांपर्यंत पोहोचल्याचा सुगावा लागल्याने आरोपींनी मुलाला संगमनेर जवळील सुकेवाडी येथे सोडून दिले.
सुकेवाडी येथे हा मुलगा एका तरुणाला आढळून आल्यानंतर त्याने याची माहिती पोलिसांना दिली. पोलिसांनी तातडीने मुलाला ताब्यात घेतले. तसेच याप्रकरणी तिघा संशयितांना ताब्यात घेऊन त्यांच्याकडे चौकशी सुरू केली आहे. या प्रकरणातील आणखी काही फरार आरोपींचा पोलीस शोध घेत आहे.
