सातभाई मर्चंट बँक बुडाली; सर्वसामान्य ठेवीदारांचे पैसे अडकले, उपोषणाचा पवित्रा

सर्वसामान्य जनतेचे अडकलेले पैसे परत मिळावे, या मागणीसाठी आता या पतसंस्थांचे संचालकच उपोषणाला बसले आहेत. सरकारने यावर कायमस्वरूपी तोडगा काढून सर्वसामान्य जनतेचे अडकलेले पैसे परत मिळावेत हीच अपेक्षा.

शिर्डी- कोपरगावच्या सातभाई मर्चंट बँकेने पतसंस्थेचे कोट्यावधी रुपये थकवल्याने ठेवीदार पतसंस्था अडचणीत आल्या आहेत. याविरोधात पतसंस्थांच्या संचालकांनी सोमवारपासून कोपरगाव निबंधक कार्यालयासमोर आमरण उपोषण केले होते.

सर्वसामान्य ठेवीदारांचे पैसे असलेल्या कोपरगाव तालुक्याच्या परिसरातील अनेक पतसंस्थांनी आपले पैसे कोपरगावच्या सातभाई मर्चंट बँकेत ठेवले होते. मात्र, बँकेच्या संचालकांनी आपल्या जवळच्या लोकांच्या नावावर लाखो रूपयांचे कर्ज घेऊन त्याची परतफेड केलीच नाही. ही बँक डबघाईला आल्यानंतर या बँकेत ठेवी ठेवलेले सर्वसामान्य ठेवीदार अडचणीत सापडले आहेत. अनेकांनी आपली पुंजी या बँकेत ठेवली होती. मात्र, संचालकांच्या या भ्रष्टाचारामुळे ठेवी ठेवणाऱया पतसंस्थां आणि सर्वसामान्य नागरिकांना आजवर बँकेचे उंबरठे झिझवावे लागत आहेत.

या बँकेचा ताबा सरकारने घेतला. त्यानंतर एक लाखांच्या आतील ठेवी असणाऱया लोकांना पैसे दिले गेले. मात्र, एक लाखाच्या वर ठेवी असणाऱयांना आजही पैसे दिले गेले नाहीत. बुडालेल्या या बँकेची आजही मोठी मालमत्ता आहे. साधारण 25 कोटी रूपये देणे असले तरी त्यापेक्षा अधिक संस्थेची मालमत्ता असून, जर बँकेचे इतर बँकेत विलीणीकरण झाले किंवा मालमत्ता विक्रीतून देणी दिल्या गेल्या तर, हा प्रश्न कायमस्वरूपी निकाली निघेल.

सर्वसामान्य जनतेचे अडकलेले पैसे परत मिळावे, या मागणीसाठी आता या पतसंस्थांचे संचालकच उपोषणाला बसले आहेत. सरकारने यावर कायमस्वरूपी तोडगा काढून सर्वसामान्य जनतेचे अडकलेले पैसे परत मिळावेत हीच अपेक्षा.