अहमदनगर- राज्य सरकारने साई मंदिर खुले करण्याचे आदेश दिले आहे. त्याचबरोबर, काय काय उपाय-योजना कराव्यात याचा अभ्यास सध्या साई संस्थानकडून केला जात आहे. कोविड काळानंतर मंदिर सुरू करणाऱ्या तिरुपती देवस्थानला साई संस्थानच्या शिष्टमंडळाने भेट देत बैठक घेतली. या बैठकीत देशपातळीवर प्रमुख देवस्‍थानांचे फेडरेशन करण्‍याचा प्रस्ताव साई संस्थानच्या वतीने देण्यात आला असून, तिरुपती देवस्थानने अनुकूलता दर्शवली असल्याची माहिती साई संस्थानचे मुख्य कार्यकारी अधिकारी कान्हुराज बगाटे यांनी दिली.
राज्य सरकारने मंदिर उघडण्याचे आदेश दिल्यानंतर दुसऱ्याच दिवशी साई मंदिर उघडता येईल त्यादृष्टीने साई संस्थान तयारी करत असून, तिरुपती देवस्थानमध्ये सध्या रोज १२ हजार भाविक दर्शन घेत आहेत. तेथील प्रसादालय सुरू आहेत. आरोग्य सेतू मार्फत कोरोनाबाधित भाविकांवर नजर ठेवण्यात येत आहे. शिवाय केवळ ऑनलाइन बुकिंग करणाऱ्या भाविकांनाच दर्शन घेऊ देण्यात येत आहे. लहान मुले व वृद्धांना तुर्तास दर्शनासाठी परवानगी देण्यात आलेली नाही. ट्रायझोन मशीन बसवण्यात आले आहे. यातून बाहेर पडणारा ओझोन कोरोनाच्या जंतू संसर्गावर मात करण्यास प्रभवी आहे. या प्रकारची मशीनरी शिर्डीतही बसवण्याबाबत प्रयत्न करणार असल्याचे बगाटे म्हणाले.
साई संस्थानच्या शिष्टमंडळाने तिरुपती देवस्थानचे आर्थिक, कर्मचारी व्यवस्थापन याचीही बारकाईने माहिती घेतली. तिरुपतीला भाविकांकडून येणारे सोने, इतर दान यांची पडताळणी पद्धती, तसेच आयकर व्यवस्थापनासाठी वेगवेगळ्या ट्रस्ट निर्मितीचा उपाय उत्तम असून, ही व्यवस्था साई संस्थानमध्ये लागू करण्याच्या दृष्टीने सखोल माहिती घेण्यात आली आहे. तसेच, तिरुपतीमध्ये भाविकांच्या वस्तूंची चोरी आणि लुटमार रोखण्यासाठी सीसीटीव्ही सर्व्हिलंस, फेस डिटेक्टक्षनद्वारे आरोपी शोधण्यात येतात. शिर्डीतही ही पद्धत अवलंबण्यात येणार असल्याचे बगाटे यांनी सांगितले.