विकासकामांसाठी 'मामा’ची मदत घ्या, नाहीतर माझाच मामा करू नका, अजित पवारांची मिश्किल टिप्पणी

नगर जिल्ह्यातील अनेकांनी निळवंडे धरणाचं पाणी येईल म्हणुन निवडणुका लढविल्यात मात्र प्रश्न प्रलंबित राहिलेत. प्राजक्त तनपुरे यांनी जयंत पाटलांकडे आता पाठपुरावा सुरु केलाय. यावर अजित पवार यांनी आता मामाला सोडू नको, नाहीतर माझाच मामा व्हायचा, असं सांग अशी मिश्किल टिप्पणी अजित पवार यांनी केली आहे.

शिर्डी (अहमदनगर) - नगर जिल्हा मोठ्या राजकारण्यांचा जिल्हा आहे, या जिल्ह्यातील अनेकांनी निळवंडे धरणाचं पाणी येईल म्हणुन निवडणुका लढविल्यात मात्र प्रश्न प्रलंबित राहिलेत. प्राजक्त तनपुरे यांनी जयंत पाटलांकडे आता पाठपुरावा सुरु केलाय. यावर अजित पवार यांनी आता मामाला सोडू नको, नाहीतर माझाच मामा व्हायचा, असं सांग अशी मिश्किल टिप्पणी करत विरोधकांवर टीका केली. राष्ट्रवादीचं सरकारच निळवंडेच काम करणार असल्याचे आश्वासनही त्यांनी दिले आहे.

उपमुख्यमंत्री अजित पवार अहमदनगर जिल्ह्याच्या दौऱ्यावर आहेत. राहुरी तालुक्यातील मुख्यमंत्री सौरऊर्जा योजनेअंतर्गत प्रकल्पाच विविध ठिकाणी त्यांनी भुमिपुजन केलं. त्यानंतर राहुरीत आयोजित प्रचारसभेत अजित पवार यांनी दिल्लीत सुरु असलेल्या शेतकऱ्यांच्या आंदोलनाला बदनाम करण्यासाठीच हिसाचार घडवून आणल्याचे म्हटले. अण्णा हजारेही आजपासुन आंदोलन करणार होते मात्र भाजपवाल्यांनी त्यांच्याकडे चकारा मारून त्यांना कमिटी स्थापन करण्याचे आश्वासन दिलंय. आता अण्णांनी त्यावर विश्वास ठेवलाय. खरंतर अण्णांवर उपोषण करण्याची वेळच येवु द्यायची नव्हती. ती आणली हाच सरकारचा नाकर्तेपणा आहे. हे सरकार शेतकरीविरोधी असल्याची टीकाही अजित पवार यांनी केली आहे.

ज्या शहरात राहतो तिथले टॅक्स भरावे लागतात -पिंपरी चिंचवड महानगरपालिका ही भाजपाच्या ताब्यात आहे. प्रभुणे प्रकरणाबाबत मला माहिती नाही. सध्या आयुक्त रजेवर गेले असल्यानं मी ते आल्यावर महिती घेईन. कोणाला कोणता पुरस्कार मिळाला तरी प्रत्येकाने आपलं रेकॉर्ड क्लिअर ठेवलं पाहिजे. मी सुद्धा उपमुख्यमंत्री असलो तरी आम्ही ज्या शहरात राहतो तिथले टॅक्स भरावे लागतात. प्रभुणे यांच्या बाबतीत मी माहिती घेतो आणि अन्याय झाला असेल तर चौकशी करेन, असे अजित पवार म्हणाले.पिचड पिता-पुत्र निशाण्यावर -राष्ट्रवादीचे तत्कालिन नेते मधुकर पिचड आणि त्यांचे पुत्र वैभव पिचड यांनी विधानसभेच्या तोंडावर भाजपात प्रवेश केला. त्यांचा हा भाजप प्रवेश राष्ट्रवादीच्या जिव्हारी लागलाय. कारण आठवड्याभरापूर्वी राष्ट्रवादीचे अध्यक्ष शरद पवार यांनीही नगर दौऱ्यात पिचड यांच्यावर निशाणा साधला होता. आज अजितदादांनीही पिचडांवर बोलताना भाजपात गेल्यापासून त्यांची अवस्था वाईट असल्याचं म्हटलं. काही लोक साहेबांना सोडून गेले, अकोल्यात त्यांची काय गत झाली बघा, सोडून गेलेले पडले, असं म्हणत खास त्यांच्या स्टाईलमध्ये त्यांनी पिचड विषयावर भाष्य केलं.