कोरोनाचा फटका साई मंदिराच्या देणगीवर, ऑनलाइन मिळाले 'इतके' दान

साई मंदिर बंद असल्याने दर्शनासाठी येणाऱ्या भक्तांवर आणि त्याच्या ओघाने देणगीवर मोठा परिणाम झाला आहे. शिर्डी साईबाबा संस्थानला दररोज जवळपास दीड कोटी रुपयांहून अधिकचं नुकसान होत आहे. मंदिर बंद असल्याने भाविक देणगीसाठी ऑनलाइन प्रणालीचाही मोठ्या प्रमाणात वापर करत आहेत.

शिर्डी - कोरोनाच्या प्रादुर्भावामुळे साई मंदिर बंद असल्याने दर्शनासाठी येणाऱ्या भक्तांवर आणि त्याच्या ओघाने देणगीवर मोठा परिणाम झाल आहे. शिर्डी साई बाबा संस्थानला दररोज जवळपास दीड कोटी रुपयांहून अधिकचं नुकसान होत आहे. तर, रामनवममी, गुरुपौर्णिमा, दसरा (साई पुण्यातिथी) उत्सवाच्या दरम्यान तीन दिवसांत तब्बल 4 कोटी रुपयांपर्यंत देणगी येत होती. मात्र यंदा सर्वच उत्सवांवर कोरोनाचा परिणाम पाहायला मिळाला. साईबाबांच्या तीन दिवसीय पुण्यतिथी उत्सवात भाविकांनी एकूण 38 लाख 10 हजार 832 रुपयांची देणगी दिली आहे. हा आकडा मागच्या वर्षीच्या तुलनेत कमी आहे.

कोरोनाचा देणगीवर परिणाम

मंदिर बंद असल्याने भाविक देणगी देण्यासाठी ऑनलाइन प्रणालीचाही मोठ्या प्रमाणात वापर करत आहेत. ऑनलाइन पद्धतीने 2 कोटी 53 लाखांहून अधिक रुपये दान देण्यात आले आहे. साई पुण्यतिथी उत्सवात म्हणजेच दसऱ्याच्या दिवशी भाविकांनी ऑनलाइन पद्धतीने 28 लाख 63 हजार रुपयांची देणगी दिली आहे. तर साई मंदिराच्या चार नंबर गेटजवळील देणगी काऊंटरवर 4 लाख 58 हजारांची रोख स्वरूपात देणगी अर्पण करण्यात आली आहे.

इतर दानाचे स्वरुप

देणगीव्यतिरिक्त इतर वस्तू देखील साईचरणी अर्पण केल्या जातात. हैदराबाद येथील साईभक्‍त सुनील शहा यांनी 90 हजार 900 रुपये किमतीची 1515 ग्रॅम चांदीची परडी साई चरणी अर्पण केली आहे. तर न्युझिलंड, कॅनडा, अमेरिका, इंग्लंड अशा चार देशांतील भाविकांनी परकीय चलन स्वरुपात 42 हजार 826 रुपयांचेही दान दिले आहे. तसेच दसऱ्याच्या दिवशी काढण्यात आलेल्या भिक्षा झोळीत 3 लाख 55 हजार 580 रुपयांचे विविध कडधान्यदेखील भाविकांनी अर्पण केले आहे.

दरवर्षीचे दान

शिर्डी संस्थानला दरवर्षी जवळपास 600 कोटी रुपयांचे दान भक्तांकडून केले जाते. यात 400 कोटी रुपये दान रुपात असून त्यात सोने, चांदी आणि इतर गोष्टींचा समावेश असतो. साई संस्थानकडे बँकेत 2300-2400 कोटी रुपये असून त्यावर दरवर्षी 100-150 कोटी रुपये व्याजापोटी मिळतात.