अहमदनगर - साईबाबांच्या हयातीपासून शिर्डीत साजरा होणारा गोकुळाष्टमी उत्सव मध्यंतरी बंद करण्यात आला होता. मात्र हा उत्सव पुन्हा सुरू करण्यात येत असल्याची माहिती साई संस्थानचे मुख्य कार्यकारी अधिकारी अरुण डोंगरे यांनी दिली आहे. गोकुळाष्टमी उत्सव पुन्हा सुरू होणार असल्याने शिर्डी ग्रामस्थांनी साई संस्थानचे अधिकारी डोंगरे यांचा सत्कार केला.
सोशल मीडियातही भाविकांनी हा उत्सव सुरू करण्याची मागणी केली होती. यासंबंधी ग्रामस्थांनी साईसंस्थानाला लेखी निवेदनाद्वारे उत्सव सुरू करण्याची मागणी केली होती.
मागील पंचवीस वर्षांपासून सुरू असलेला साईचरित्र पारायण सोहळा श्रावणाच्या पहिल्या दिवशी सुरू होत असे. आता तो साधारण पंधरा दिवस पुढे गोकुळाष्टमीला जोडून घेण्यात येणार आहे. त्यामुळे पूर्वीचा गोकुळाष्टमी उत्सव पुनर्जिवीत होणार आहे. साईचारित्र पारायण सोहळा श्रीकृष्ण नवरात्रात येत असल्याने त्याचे वेगळे महत्व आहे. या उत्सवामुळे श्रावणात भाविकांचा ओघ वाढणारआहे. कोरोनामुळे यंदा हा उत्सव भाविकांशिवाय साध्या पद्धतीने साजरा होईल.
