साईबाबा मंदिरातील कर्मचाऱ्यांवर असणार आता कॅमेऱ्यांची नजर

कर्मचाऱ्यांच्या हजेरी सोबत इतर संशयास्पद व्यक्तींवर या कॅमेऱ्यामार्फत नजर ठेवण्यात येणार असल्याने साई मंदिराची सुरक्षा व्यवस्था मजबूत होणार आहे.

अहमदनगर- शिर्डी येथील साईबाबा मंदिरातील कर्मचा-यांवर आता कॅमेऱ्याची नजर असणार आहे. साईबाबा मंदिरातील प्रवेशद्वार क्रमांक 4 वर फेस डिटेक्शन कॅमेरा बसवण्यात आला आहे. यामुळे कर्मचारी कोणत्या वेळी कामावर आले याची नोंद होणार आहे, अशी माहिती साई मंदिराचे कार्यकारी अधिकारी दिपक मुगळीकर यांनी दिली.

साईबाबा संस्थानच्या विविध विभागात शेकडो कर्मचारी काम करत असतात. तीन शिफ्टमध्ये सर्व विभागांचे काम सुरू असते, यामुळे कामावर येणारे कर्मचारी कधी येतात, कधी जातात यावर नजर ठेवणे अवघड होते. मात्र,आता अत्याधुनिक तंत्रज्ञानाचा वापर कर्मचाऱ्यांची हजेरी नोंदवण्यासाठी केला जाणार आहे.

साईबाबा मंदिराच्या प्रवेशद्वारावर क्रमांक 4 वर मॅट्रीक्स कंपनीच्या माध्यमातून फेस डिटेक्शन कॅमेरा बसवण्यात आला आहे. या कॅमेऱ्याच्या मदतीने कामावर येणाऱ्या सर्व कर्मचाऱ्यांची नोंद या यंत्रणेमार्फत ठेवली जाणार आहे. कर्मचारी कॅमेऱ्याच्या समोर येताच त्याच्या येण्याची नोंद यंत्रणेत होणार आहे. त्याबरोबरच यंत्रणेमुळे उशिरा येणाऱ्या कर्मचाऱ्यांची नोंद होणार आहे.

प्रायोगिक तत्त्वावर सुरूवातीला फक्त एकाच प्रवेशद्वारावर हि यंत्रणा बसवण्यात आली असून थोड्याच दिवसात साईबाबा मंदिराचे सर्व विभाग या यंत्रणेच्या कक्षेत येणार आहेत.