पास देण्याचा निर्णय अचानक बदलल्याने शिर्डीत भाविकांची गैरसोय

दर्शनाचा कालावधी कमी करत गुरुवार आणि आठवड्याअखेर मोफत बायोमेट्रीक पासेस न देण्याचा निर्णय जाहीर केला होता. मात्र, आज पहिल्याच गुरुवारी तो निर्णय बदलल्याने कोरोनाच्या नियमांचा फज्जा उडाला तर भक्तांना उन्हात तासन् तास उभे राहावे लागले. यावर भाविकांनी नाराजी व्यक्त केली.

शिर्डी (अहमदनगर) -कोरोनाचे रुग्ण वाढत असल्याने महाराष्ट्रात नियम कडक करण्यात आले आहेत. याच धर्तीवर शिर्डीच्या साईबाबा संस्थाननेही दर्शनाचा कालावधी कमी करत गुरुवार आणि आठवड्याअखेर मोफत बायोमेट्रीक पासेस न देण्याचा निर्णय जाहीर केला होता. मात्र, आज पहिल्याच गुरुवारी तो निर्णय बदलल्याने कोरोनाच्या नियमांचा फज्जा उडाला तर भक्तांना उन्हात तासन् तास उभे राहावे लागले. यावर भाविकांनी नाराजी व्यक्त केली.

राज्यात पुन्हा करोनाचे रुग्ण वाढू लागल्यानंतर साई संस्थाने दोन दिवसांपूर्वी साई दर्शनाचा कालावधी कमी केला होता. याच बरोबरीने मंदिराबाहेर होणारी गर्दी नियंत्रणात ठेवण्यासाठी गुरुवार, शनिवार, रविवारी शिर्डीत येणाऱ्या भाविकांनी दिले जाणारे बायोमेट्रीक मोफत दर्शन पासेस न देण्याचा निर्णय जाहीर केला होता. मात्र, तो निर्णय आज शिर्डीत गर्दी झाल्याने पुन्हा मागे घेण्यात आल्याचे पाहायला मिळत असून भक्तांना दर्शन देणे, हे आमचे काम असल्याचे साई संस्थानच्या अधिकाऱ्यांनी सांगितले.

पूर्वीही मोफत पासेस न देण्याचा निर्णय घेऊन तो मागे घेतला होता

साईबाबा संस्थानने या पूर्वीही मोफत पासेस न देण्याचा निर्णय घेऊन तो मागे घेतला होता. आता दर्शन पास वितरण करणाऱ्या काही ठिकाणी भक्तांमध्ये सुरक्षित
अंतर ठेवण्याचा प्रयत्न केला जातोय. मात्र, त्या पुढे जावून पासेस रांगेत भक्तांमध्ये अंतर राखले जात नसल्याचे वारंवार समोर येत आहे. दरम्यान, भक्तांना तासनतास उन्हात अनवानी पायाने उभे रहावे लागत असल्याने भक्तांनी साई संस्थांच्या व्यवस्थेबद्दल राग व्यक्त केला. करोनाचे नियम पाळण्यासाठी दर्शन व्यवस्थेत बदल केला आहे. मात्र, साई संस्थानने दर्शन रांगेची अपुरी व्यवस्था केल्याने भक्तांना उन्हाचा चटका, स्वच्छता गृहाची सोय होत नसल्याने भाविकांनी साई संस्थानवर नाराजी व्यक्त केली.