सत्यजित तांबेंना राज्यसभा उमेदवारीसाठी काँग्रेस कार्यकर्ते आग्रही..

राज्यसभेच्या खासदार पदासाठीच्या आगामी निवडणुकीसाठी महाराष्ट्र प्रदेश युवक काँग्रेसचे अध्यक्ष सत्यजीत तांबे यांना उमेदवारी देण्यात यावी, अशी मागणी आहे. नगर मधील काँग्रेस पक्षाच्या पदाधिकारी व कार्यकर्ते यांच्यावतीने ही मागणी करण्यात आली.

अहमदनगर- महाराष्ट्रातून रिक्त होणार्‍या राज्यसभेच्या खासदार पदासाठीच्या आगामी निवडणुकीसाठी महाराष्ट्र प्रदेश युवक काँग्रेसचे अध्यक्ष सत्यजीत तांबे यांना उमेदवारी देण्यात यावी, अशी मागणी आहे. महाराष्ट्र प्रदेश काँग्रेसचे अध्यक्ष तथा महसूल मंत्री बाळासाहेब थोरात यांच्याकडे नगर मधील काँग्रेस पक्षाच्या पदाधिकारी व कार्यकर्ते यांच्यावतीने ही मागणी करण्यात आली.

सत्यजीत तांबे

प्रतिकूल परिस्थितीत महाराष्ट्रात कॉंग्रेस पक्ष वाढवण्यासाठी प्रदेश युवक कॉंग्रेसचे अध्यक्ष या नात्याने त्यांनी अत्यंत मेहनत घेऊन युवकांना संघटीत केले आहे. त्याचा अपेक्षित परिणाम निश्चितच महाराष्ट्राच्या विधानसभा निवडणुकीत दिसून आलेला आहे. त्यांच्या या कामाचा गौरव म्हणून महाराष्ट्र प्रदेश काँग्रेस व अखिल भारतीय काँग्रेस कमिटीचे वतीने सत्यजीत तांबे यांना महाराष्ट्रातून काँग्रेस पक्षाची राज्यसभेची उमेदवारी जाहीर करून त्यांना न्याय द्यावा अशी आग्रही मागणी शहर जिल्हा कॉंग्रेस उपाध्यक्ष बाळासाहेब भंडारी यांनी केली आहे

दिल्ली वर्तुळात तांबे पक्ष वरिष्ठांच्या जवळ!!

सत्यजित तांबे यांनी गेल्या काही वर्षांपासून दिल्लीत तळ दिलेला आहे. उच्चविद्याविभूषित असलेले सत्यजित दिल्लीच्या काँग्रेस संस्कृतीत फिट बसल्याचे बोलले जातेय. लोकसभा निवडणुकीत संगमनेरमध्ये आयोजित राहुल गांधी यांच्या सभेसाठी त्यांनी मोठी मेहनत घेतली होती. या सभेनंतर राहुल गांधी यांनी संगमनेरमध्ये अचानक मुक्काम करण्याचा निर्णय घेतल्या नंतर सर्वव्यवस्था त्यांनी पुढाकार घेऊन केली होती. एकूणच सत्यजित आणि त्यांचे मामा बाळासाहेब थोरात हे आज मितीला गांधी परिवाराच्या विश्वासू फळीतले म्हणून ओळखले जात आहेत. जिल्ह्यात राधाकृष्ण विखे भाजपात गेल्याने थोरातांची जिल्ह्यावर सध्या एकहाती पकड आहे. खा.सुजय विखे, आ.रोहित पवार या तरुण नेतृत्वाचा जिल्ह्यात उदय झालेला असताना युवक काँग्रेसचे प्रदेश अध्यक्ष असलेल्या सत्यजित तांबे यांना राज्यसभेवर उमेदवारी मिळावी यासाठी आता पेरणी सूरी झाल्याचे चित्र आहे.