गंभीर गुन्हे दाखल असलेला भाजपच्या पदाधिकाऱ्यावर स्थानबद्धतेची कारवाई

भारतीय जनता युवा मोर्चाचा पदाधिकारी नंदू प्रकाश गोरे (वय 31) याच्यावर एमपीडीए व मकोका कायाद्यान्वये एक वर्षासाठी स्थानबद्धतेची कारवाई करण्यात आली आहे.

अहमदनगर- जामखेड तालुक्यातील आपटी ग्रामपंचायतचा माजी सरपंच व भारतीय जनता युवा मोर्चाचा पदाधिकारी नंदू प्रकाश गोरे (वय 31) याच्यावर एमपीडीए व मकोका कायाद्यान्वये एक वर्षासाठी स्थानबद्धतेची कारवाई करण्यात आली आहे. त्याची रवानगी आता नाशिक मध्यवर्थी कारागृहात होणार आहे.

याबाबत जामखेड पोलिसांनी दिलेली माहिती अशी की, जिल्ह्यातील धोकादायक व्यक्ती, वाळू तस्कर, अवैध धंदे, रेकॉर्डवरील सराईत गुन्हेगार, दृकश्राव्य कलाकृतीचे विनापरवाना प्रदर्शन करणाऱ्या व्यक्ती, कुविख्यात गुन्हेगार यांच्या विरूद्ध कडक कारवाई करण्याचे संकेत तत्कालीन पोलीस अधीक्षक अखिलेशकुमार सिंह, जिल्हा पोलीस अधीक्षक मनोज पाटील यांनी दिले आहेत.

त्याअनुषंगाने जामखेड पोलीस ठाण्याचे पोलीस निरीक्षक प्रभाकर पाटील यांनी जामखेड येथील धोकादायक व्यक्ती म्हणून तालुक्यातील आपटी येथील नंदू गोरे याच्यावर सन 2015 ते 2020 या कालावधीमध्ये जामखेड पोलीस ठाण्यामध्ये हाणामारी, बेकायदा शस्र घेऊन फिरणे, धमकावणे, असे विविध प्रकारचे सात गंभीर स्वरूपाचे गुन्हे दाखल आहेत.

त्यामुळे त्याच्यावर एमपीडीए कारद्यानुसार कारवाई करावी असा प्रस्ताव जिल्हाधिकारी राहुल द्विवेदी यांच्याकडे पाठवला होता. त्यानुसार जिल्हाधिकाऱ्यांनी अंतिम निर्णय घेऊन धोकादायक व्यक्ती म्हणून नंदू गोरे यास एक वर्षासाठी स्थानबद्धतेचे आदेश पारीत केले आहे. नंदू गोरे हा भाजप युवा मोर्चाचा पदाधिकारी आहे.

सहाय्यक पोलीस निरीक्षक अवतारसिंग चव्हाण यांनी कारवाई करून नंदू गोरे यास मकोका कायद्यान्वये अटक करून नाशिक येथील मध्यवर्ती कारागृहात एक वर्षांसाठी स्थानबद्ध केले आहे.

हेही वाचा -एमपीएससी परीक्षा आणि पोलीस मेगाभरती पुढे ढकला, जिल्हा पोलीस बैठकीत मागणी..