मुंबई - राज्यामध्ये होत असलेल्या महिलांवरील अत्याचार घटनांमध्ये लक्षणीय वाढ झाली आहे, या घटना रोखण्यास राज्य सरकार अपयशी झाल्याचा आरोप करत, सोमवारी राज्यात विविध ठिकाणी भाजपा महिला आघाडीकडून महाविकास आघाडी सरकारविरोधात आंदोलन करण्यात आले. यावेळी मोठ्या प्रमाणावर महिला कार्यकर्त्यांनी सरकारविरोधात तीव्र निर्दशने केली.
राज्यात महिला अत्याचाराच्या घटनेत वाढ झाली आहे, मात्र याबाबत सरकारला गांभीर्य नसल्याचे सांगत सोमवारी भाजपाच्यावतीने राज्य सरकारचा निषेध करण्यासाठी आंदोलन करण्यात आले. अहमदनगरच्या शेवगाव-पाथर्डी येथे भाजपा महिला आघाडीच्यावतीने सत्ताधारी महाविकास आघाडी सरकारविरोधात आंदोलन करण्यात आले. महाराष्ट्रमध्ये दिवसेंदिवस महिला अत्याचाराच्या घटना वाढत असून ही स्थिती चिंताजनक आहे. मात्र, तरीही राज्य सरकार याबाबत कारवाई करत नसल्याचा आरोप यावेळी आंदोलनकर्त्यांनी यावेळी केला.
तर, राज्यात महाविकास आघाडी सरकारच्या काळात महिलांवरील आत्याचार वाढले असून महिलामध्ये असुरक्षितेची भावना निर्माण झाली आहे, त्यामुळे महिला अत्याचारविरोधी कडक कायदे करावे, अशी मागणी करत औरंगाबाद कन्नड येथे भाजपा तालुका महिला मोर्चाच्या वतीने आंदोलन करण्यात आले.
ठाकरे सरकारच्या विरोधात भाजपच्या महिला मोर्चाने ठाण्यातील मीरा भाईंदरमध्ये निदर्शने केली. यावेळी महापौर जोस्ना हसनाळे यांच्यासह संपूर्ण महिला मोर्चा पदाधिकारी उपस्थित होते. महाविकास आघाडी सरकारने महिलावरील अत्याचार प्रकरणी कठोर पावले उचलली पाहिजेत, अन्यथा भाजपा अधिक तीव्र आंदोलन करणार असा इशारा यावेळी त्यांनी दिला.
तर, नांदेडमध्ये भाजपा महिला मोर्चाच्या वतीने सोमवारी आयटीआय चौकात आक्रोश आंदोलन करण्यात आले. या आंदोलनात महिला मोठ्या संख्येने सहभागी झाल्या होत्या. महिलांवरील अत्याचाराच्या घटना सातत्याने वाढतच आहेत. त्यामुळे झोपलेल्या आघाडी सरकारला जागे आणण्यासाठी हे आक्रोश आंदोलन करण्यात आल्याचे भाजपा महिला मोर्चाच्या पदाधिकाऱ्यांनी सांगितले.