आजपासून पुन्हा 'लॉकडाऊन', शिर्डीतील बाधितांची संख्या वाढल्याने निर्णय

चाळीस हजार लोकसंख्या असलेल्या शिर्डीत गेल्या तीन दिवसांत चोवीस कोरोनाबाधित रुग्ण सापडले आहेत. याच पार्श्वभूमीवर शिर्डीतील नागरिकांनी स्वयंस्फूर्तीने पुढील दहा दिवस लॉकडाऊन पाळण्याचा निर्णय घेतला आहे़.

अहमदनगर - चाळीस हजार लोकसंख्या असलेल्या शिर्डीत गेल्या तीन दिवसांत चोवीस कोरोनाबाधित रुग्ण सापडले आहेत. याच पार्श्वभूमीवर शिर्डीतील नागरिकांनी स्वयंस्फूर्तीने पुढील दहा दिवस लॉकडाऊन पाळण्याचा निर्णय घेतला आहे़. नागरिकांनी घेतलेल्या या निर्णयाचे प्रांताधिकारी गोविंद शिंदे व नगरपंचायतचे मुख्याधिकारी सतीश दिघे यांनी स्वागत केले आहे. नागरिकांनी स्वयंस्फुर्तीने घेतलेल्या या निर्णयामुळे शहरात कोरोनाचा संसर्ग रोखण्याच्या दृष्टीने चांगले परिणाम दिसतील, असा विश्वास शिंदे व दिघे यांनी व्यक्त केला आहे.

मागील काळात शिर्डीत क्वचितच बाधित रुग्ण आढळून येत होता. आठ दिवसांपूर्वी देखील शहरात एकूण सात बाधित रुग्ण होते. मात्र मंगळवारी एकाच कुटुंबात सात बाधित रुग्ण सापडले. तसेच बुधवारी नऊ तर गुरुवारी आठ जणांचे अहवाल पॉझिटिव्ह आले आहेत. त्यानुसार पटेल कॉलनीत 1, पिंपळवाडी रोड लोढा कॉलनीत 4, हेडगेवारनगर 1 आणि घरकाम करणाऱ्या महिलेसह तिचा मुलगा असे एकूण 8 रुग्णांचे अहवाल पॉझिटिव्ह आले आहेत. गेल्या दोन दिवसात बाधित व्यक्तींच्या संपर्कातील 30 जणांना साई आश्रमात विलगीकरण कक्षात ठेवण्यात आले असून संपर्कातील आणखी व्यक्तींचा शोध सुरू असल्याचे नगरपंचायत नोडल अधिकारी मुरलीधर देसले यांनी सांगितले.

आजपासून दहा दिवस संपूर्ण 'बंद'

शिर्डीतील वाढत्या पेशंटच्या पार्श्वभूमीवर नागरिकांनी व व्यवसायिकांनी दहा दिवसांसाठी लॉकडाऊन पाळण्याचा निर्णय घेतला आहे. त्यामुळे 17 जुलै पासून पुढील दहा दिवस शहरात संपूर्ण लॉकडाऊन असणार आहे. या काळात सकाळी 9 ते दुपारी 2 वाजे पर्यंत फक्त अत्यावश्यक असलेल्या मेडीकल, किराणा, भाजीपाला व दूध या अत्यावश्यक सेवाच सुरू राहतील. अन्य सर्व दुकाने, संस्था बंद ठेवण्यात येणार आहेत.