लंडन -स्वित्झर्लंडचा दिग्गज टेनिसपटू रॉजर फेडररला धूळ चारणाऱ्या ऑस्ट्रियाच्या डोमिनिक थीमने जागतिक क्रमवारीत दुसऱ्या स्थानी असलेल्या नोव्हाक जोकोविचलाही हरवले आणि उपांत्यफेरी गाठली. अत्यंत रोमहर्षक झालेल्या सामन्यात थीमने जोकोविचवर ६-७, ६-३, ७-६ अशी मात दिली.
हेही वाचा -हिटमॅन रोहितचा अनोखा विक्रम, दोन मालिकेत खेळणार तीन रंगांच्या चेंडूनं
या स्पर्धेच्या उपांत्य फेरीपर्यंत पोहोचणारा तो पहिला खेळाडू ठरला आहे. शेवटच्या सामन्यात त्याने स्वित्झर्लंडचा दिग्गज खेळाडू रॉजर फेडररचा पराभव केला होता. या सामन्याच्या सुरूवातीला थीम पिछाडीवर होता. टाय ब्रेकरमध्ये गेलेल्या पहिल्या सेटमध्ये जोकोविचने ७-५ ने बाजी मारली.
दुसर्‍या सेटमध्ये मात्र, थीमने पुनरागमन करत ६-३ च्या फरकाने सामना जिंकला आणि सामना बरोबरीत रोखला. थरारक झालेल्या तिसऱ्या सेटच्या टायब्रेकरमध्ये थीमने ७-५ असा विजय नोंदवत उपांत्यफेरी गाठली.