प्रतिष्ठित ऑलिम्पिक मशाल 'या' तारखेला मैदानात पोहोचणार

टोकियो ऑलिम्पिक मशाल ९ जुलै रोजी टोकियोच्या ऑलिम्पिक स्टेडियमवर दाखल होईल आणि २३ जुलै रोजी उद्घाटन सोहळ्यासाठी ठेवली जाईल. ऑलिम्पिक स्पर्धा आता २३ जुलै ते ८ ऑगस्ट २०२१ या काळात होणार आहेत.

नवी दिल्ली - प्रतिष्ठित मानली जाणारी ऑलिम्पिक 'मशाल रिले'ची सुरुवात २५ मार्च २०२१ रोजी फुकुशिमा द्वीपकल्पातील जे व्हिलेज प्रशिक्षण केंद्रापासून होणार आहे. ही मशाल १२१ दिवस जपानमधील सर्व ४७ प्रांतांमधून प्रवास करेल. आंतरराष्ट्रीय ऑलिम्पिक समितीने (आयओसी) ही घोषणा केली.

ही मशाल ९ जुलै रोजी टोकियोच्या ऑलिम्पिक स्टेडियमवर दाखल होईल आणि २३ जुलै रोजी उद्घाटन सोहळ्यासाठी ठेवली जाईल. टोकियो ऑलिम्पिक व पॅरालिम्पिक क्रीडा स्पर्धेसाठी या 'मशाल रिले'च्या मार्गात आणि वेळापत्रकात कोणताही बदल केला जाणार नाही, असे आयओसीने म्हटले आहे.

यावर्षी होणाऱ्या टोकियो ऑलिम्पिक व पॅरालिम्पिक स्पर्धा कोरोना व्हायरसमुळे एका वर्षासाठी पुढे ढकलण्यात आल्या आहेत. या स्पर्धांच्या नवीन तारखांची घोषणा झाली असून स्थानिक माध्यमांच्या वृत्तानुसार, ऑलिम्पिक स्पर्धा आता २३ जुलै ते ८ ऑगस्ट २०२१ या काळात होणार आहेत. तर पॅरालिम्पिक स्पर्धा २४ ऑगस्ट ते ५ सप्टेंबर दरम्यान आयोजित केल्या जातील.

कोरोना व्हायरसमुळे हे ऑलिम्पिक स्पर्धा एका वर्षासाठी पुढे ढकलल्या गेल्या आहेत. या स्पर्धा यापूर्वी २४ जुलै ते ९ ऑगस्ट दरम्यान होणार होत्या.