प्रो कबड्डी : सलग चौथ्या विजयाबरोबर जयपूरचा संघ प्रथम क्रमांकावर, पाटणावर मात

जयपुरने शनिवारी झालेल्या सामन्यात पाटणा पायरेट्सचा ३४-२१ ने पराभव केला.

पाटणा - प्रो कबड्डीच्या सातव्या हंगामात सलग चौथ्या विजयाबरोबर जयपूर पिंक पँथर्सने गुणतालिकेत अव्वल स्थान काबीज केले आहे. जयपूरने शनिवारी झालेल्या सामन्यात पाटणा पायरेट्सचा ३४-२१ ने पराभव केला.

जयपूरचा संघ पहिल्या सत्रात १५-९ ने आघाडीवर होता. त्यानंतर दुसऱ्या सत्रातही जयपूरच्या संघाने दमदार प्रदर्शन करत तीन वेळा विजेत्या पाटणाला पराभूत केले. जयपूरकडून दीपक नरवाल आणि संदीप धुल यांनी चांगले प्रदर्शन केले. दीपक नरवालने ९ तर, संदीप धुलने ८ गुण पटकावले. जयपूरने चढाईमध्ये १२, टॅकलमध्ये १७, अतिरिक्त १ आणि ऑलआऊटमध्ये ४ गुण पटकावले आहेत.

पाटणा पायरेट्सकडून कर्णधार प्रदीप नरवालने ९ गुण पटकावत संघाच्या कामगिरीत महत्वाचा वाटा उचलला. पाटणाने चढाईमध्ये १२, टॅकलमध्ये ७ तर अतिरिक्त म्हणून २ गुण पटकावले आहेत. पाटणाने चार सामन्यात दोन पराभव पत्करले आहेत. हा संघ ११ गुणांसंह सहाव्या क्रमांकावर आहे.