गुवाहाटी - खेलो इंडिया युथ गेम्समध्ये जिम्नॅस्टिक्स प्रकारात महाराष्ट्राची अस्मी बडदेने जबरदस्त कामगिरी केली आहे. तिने या स्पर्धेत १७ वर्षांखालील गटात आतापर्यंत ४ सुवर्णपदकांची कमाई केली आहे.
गुवाहाटीच्या भोगेश्वरी फुकनानी स्टेडियमध्ये खेलो इंडिया युथ गेम्स स्पर्धा रंगली आहे. यात अस्मीने शुक्रवारी रिदमिक सर्वसाधारण प्रकारात सुवर्णपदक जिंकले होते. त्यामध्ये तिने आज (शनिवार) चेंडू, दोरी व रिबन प्रकारातील सुवर्णपदकांची भर घातली.
क्लब रँक प्रकारात मात्र, अस्मीला रौप्यपदकावर समाधान मानावे लागले. या प्रकारात श्रेया बंगाळे हिने तिला मागे टाकून सोनेरी कामगिरी केली. श्रेयाने दोरी प्रकारात रौप्यपदक तर चेंडू प्रकारात ब्राँझपदक पटकाविले.