PRO KABADDI 2019 : संदीप धुलच्या बळावर रोमांचक सामन्यात जयपूरने मारली बाजी

जयपूरने सामना संपायला अवघी ३ मिनिटे शिल्लक असताना बंगालची ४ गुणांची आघाडी मोडीत काढली. अखेरच्या क्षणी झालेल्या चुकांमुळे बंगालला पराभवाला सामोरे जावे लागले.

मुंबई- प्रो कबड्डीत आज (शनिवार) दुसऱ्या सामन्यात जयपूर पिंक पँथर्ससमोर बंगाल वॉरिअर्सचे कडवे आव्हान होते. परंतु, अतिशय रोमांचक झालेल्या सामन्यात जयपूरने अखेरच्या क्षणी चांगला खेळ करताना २७-२५ अशा गुणफरकाने सामना जिंकला. जयपूरकडून संदीप धुलने बचावात ८ गुणांची कमाई करत विजयात मोठी भूमिका बजावली.

बंगाल वॉरिअर्सने पहिल्या सत्राच्या सुरुवातीला चांगला खेळ करताना जयपूरवर दबाव निर्माण करत आघाडी घेतली होती. परंतु, जयपूरने पुनरागमन करत बंगालची आघाडी कमी केली. पहिले सत्र संपल्यानंतर बंगालकडे १४-१० अशी ४ गुणांची आघाडी होती. दुसऱ्या सत्रात जयपूरने सामना संपायला अवघी ३ मिनिटे शिल्लक असताना बंगालची ४ गुणांची आघाडी मोडीत काढली. जयपूरने सामन्याच्या ३८ व्या मिनिटाला बंगालवर लोन चढवताना १ गुणाची आघाडी घेतली. कर्णधार दीपक हुडाने शेवटच्या मिनिटाला बलदेव सिंगला बाद करत जयपूरचा २७-२५ असा विजय निश्चित केला. यासोबत दीपक हुडाने प्रो कबड्डीत ८०० गुणांचा टप्पाही पार केला.

जयपूरकडून चढाईत दीपक हुडाने ६ गुण आणि दीपक नरवालने ४ गुणांची कमाई केली. बचावात एकट्या संदीप धुलने ८ गुण घेतले. तर, त्याला अमित हुडा २ गुण घेत चांगली साथ दिली. बंगालकडून चढाईत के. प्रपंजनने ७ गुण, कर्णधार मनिंदर सिंगने ६ गुण घेतले तर, बलदेव सिंगने बचावात ६ गुणांची कमाई करत संघाला शेवटपर्यंत सामन्यात आघाडीवर ठेवले होते. परंतु, अखेरच्या क्षणी झालेल्या चुकांमुळे बंगालला पराभवाला सामोरे जावे लागले.