नवी दिल्ली : आंतरराष्ट्रीय क्रिकेट परिषदेने (ICC) वर्ल्ड टेस्ट चॅम्पियनशिप फायनल 2023 ची तारीख जाहीर केली. या वर्षी, WTC 2023 चा अंतिम सामना ओव्हल मैदानावर खेळवला जाणार आहे. जागतिक कसोटी चॅम्पियनशिपचा अंतिम सामना 7 ते 11 जूनदरम्यान लंडनमधील ओव्हल मैदानावर खेळवला जाणार आहे. याशिवाय 12 जूनचा दिवस अंतिम सामन्यासाठी राखीव ठेवण्यात आला आहे. वर्ल्ड टेस्ट चॅम्पियनशिपच्या पहिल्या सत्राचा अंतिम सामना भारत विरुद्ध न्यूझीलंड यांच्यात साउथम्प्टन (इंग्लंड) येथे खेळला गेला. ज्यामध्ये न्यूझीलंडने भारताचा 8 गडी राखून पराभव केला.
भारताला चॅम्पियनशिपचा अंतिम सामना खेळायचा असेल तर :यावेळी वर्ल्ड टेस्ट चॅम्पियनशिपचा अंतिम सामना भारत विरुद्ध ऑस्ट्रेलिया यांच्यात होऊ शकतो. सध्याच्या जागतिक कसोटी चॅम्पियनशिपच्या गुणतालिकेत ऑस्ट्रेलिया ७५.५६ टक्के गुणांसह पहिल्या स्थानावर आहे. तर, भारत ५८.९३ टक्क्यांसह दुसऱ्या स्थानावर आहे. त्याचवेळी आता ९ फेब्रुवारीपासून सुरू होणारी बॉर्डर-गावस्कर करंडक स्पर्धा दोन्ही संघांसाठी महत्त्वाची बनली आहे. भारताला चॅम्पियनशिपचा अंतिम सामना खेळायचा असेल, तर मालिका 3-1 अशी जिंकणे आवश्यक आहे. अन्यथा भारताला अंतिम फेरीत स्थान मिळवण्यासाठी इतर संघांच्या विजय-पराजयावर अवलंबून राहावे लागेल.