Asian Weightlifting Championship 2023 : 20 वर्षीय जेरेमीचा पराक्रम, आशियाई वेटलिफ्टिंग चॅम्पियनशिपमध्ये जिंकले रौप्यपदक!

भारताचा 20 वर्षीय स्टार युवा वेटलिफ्टर जेरेमी लालरिनुंगा याने आशियाई वेटलिफ्टिंग चॅम्पियनशिप 2023 मध्ये कमाल केली आहे. जेरेमीने पुरुषांच्या 67 किलो वजनी गटात 141 किलो वजन उचलून रौप्यपदक जिंकले आहे.

नवी दिल्ली : भारतीय वेटलिफ्टर जेरेमी लालरिनुंगा याने रविवारी येथे झालेल्या आशियाई वेटलिफ्टिंग चॅम्पियनशिपमध्ये पुरुषांच्या 67 किलो वजनी गटात रौप्य पदक जिंकले. परंतु क्लीन अँड जर्कमधील तीनही प्रयत्नांमध्ये तो अपयशी ठरला. 2022 च्या राष्ट्रकुल खेळांनंतर त्याच्या पहिल्या स्पर्धेत भाग घेणारा जेरेमी 12 लिफ्टर्सपैकी एकमेव खेळाडू होता ज्याला त्याची स्पर्धा पूर्ण करता आली नाही. त्याची ही वजन श्रेणी ऑलिम्पिकचा भाग नाही.

वैयक्तिक सर्वोत्तम कामगिरीची बरोबरी केली : जेरेमीने 141 किलो वजन उचलून वैयक्तिक सर्वोत्तम कामगिरीची बरोबरी करत रौप्यपदक जिंकले. क्लीन अँड जर्कमध्ये त्याला पहिल्या दोन प्रयत्नांत 165 किलो वजन उचलता आले नाही. विद्यमान युवा ऑलिम्पिक चॅम्पियन 20 वर्षीय जेरेमीने तिसर्‍या प्रयत्नात वजन 168 किलोपर्यंत वाढवले ​​पण ते उचलण्यात तो अपयशी ठरला. हे वजन त्याच्या सर्वोत्तम कामगिरीपेक्षा दोन किलो अधिक होते. एकूण सहा स्नॅच आणि क्लीन अँड जर्कच्या प्रयत्नांमध्ये जेरेमीला केवळ दोनदा यश मिळाले. मांडीच्या दुखापतीमुळे गतवर्षीच्या जागतिक अजिंक्यपद स्पर्धेला मुकलेल्या या मिझोरामच्या खेळाडूने सुरुवातीला घाई दाखवली होती.

तिसऱ्या प्रयत्नात यशस्वी : आपल्या पहिल्या प्रयत्नात तो 137 किलो वजन उचलू शकला नाही, पण पुढच्या प्रयत्नात त्याने तेच वजन यशस्वीपणे उचलले. यानंतर तिसऱ्या प्रयत्नात त्याने 141 किलो वजन उचलून या प्रकारात दुसरे स्थान पटकावले. मात्र एकूण लक्ष गाठू न शकल्याने पदक वितरण सोहळ्यात त्याच्या चेहऱ्यावर निराशा स्पष्टपणे दिसून आली. चीनच्या हे यूजी ने 320 किलो (147 किलो + 173 किलो) उचलून सुवर्णपदक जिंकले, तर कोरियाच्या ली सांग्योन ने 314 किलो (139 किलो + 175 किलो) आणि उझबेकिस्तानच्या एर्गाशेव अधखमजोनने 312 किलो (137 किलो + 137 किलो) उचलून अनुक्रमे रौप्य आणि कांस्य पदक जिंकले. बिंदयाराणी देवीने शनिवारी महिलांच्या 55 ​​किलो वजनी गटात रौप्य पदक जिंकून भारताचे खाते उघडले होते.

हेही वाचा :