मुंबई - पंतप्रधान नरेंद्र मोदी यांच्या आवाहनानंतर आज देशभरात 'जनता कर्फ्यू' पार पडला. यात सायंकाळी पाच वाजता नागरिकांनी पाच मिनिटे गजर करत, आपल्याला सेवा देणाऱ्या व्यक्तींचे आभार मानले. भारताच्या महिला हॉकी संघानेही मोदींच्या या आवाहनाला प्रतिसाद दिला.
देशवासीयांनी एकत्र येत आज पाच वाजता गजर केला. यामध्ये क्रीडा विश्वही मागे राहिलेले नाही. भारताच्या हॉकी संघानेही पाच वाजता टाळ्या वाजवून गजर केला. त्यांचा व्हिडिओ भारताचे क्रीडा मंत्री किरण रिजिजू यांनी आपल्या ट्विटरवर पोस्ट केला आहे.
यात महिला हॉकी संघाचे खेळाडू एकत्रित टाळ्यांचा गजर करताना दिसत आहेत. पंतप्रधान नरेंद्र मोदींच्या आवाहनाला देशभरामधून जोरदार प्रतिसाद मिळाला आहे. आज सांयकाळी ५ वाजता देशवासियांनी टाळ्या-थाळ्या अन् घंटेचा नाद करत कोरोना विषाणू प्रादुर्भावासंदर्भात जनजागृती निर्माण करणाऱ्याचे आभार व्यक्त केले. जनतेसह राज्यांचे मुख्यमंत्री आणि विविध क्षेत्रातील मान्यवरांनी कोरोनाशी लढणाऱ्यांना टाळ्या वाजवून सलामी दिली.