मुंबई - टोकियो पॅराऑलिम्पिकला आजपासून सुरूवात होणार आहे. टोकियोत आज या स्पर्धेचा उद्घाटन सोहळा रंगणार आहे. भारताचे 54 खेळाडू या पॅराऑलिम्पिकमध्ये सहभागी होणार आहेत. या दरम्यान, भारतीय क्रिकेट संघाचा कर्णधार विराट कोहलीने भारतीय अॅथलिटना चांगल्या कामगिरीसाठी शुभेच्छा दिल्या. याआधी सचिन तेंडुलकरने पॅराअॅथलिटना रियल हिरो असल्याचे म्हटलं होतं. तसेच त्यांनी संपूर्ण देशांने खेळाडूंना पाठिंबा द्यावा, अशी विनंती देखील केली होती.
विराट कोहलीने सोमवारी ट्विट करून म्हटलं की, "टोकियो पॅराऑलिम्पिकमध्ये भाग घेणाऱ्या भारतीय अॅथलिट आणि संघातील सर्व सदस्यांना माझ्याकडून शुभेच्छा आणि त्यांना माझा पाठिंबा आहे. मी तुमच्यातील प्रत्येकांसाठी चीयर करेन आणि मला विश्वास आहे की तुम्ही या स्पर्धेत देशाचे नाव उज्वल कराल."
विराट कोहलीच्या आधी भारतीय संघाचा माजी दिग्गज खेळाडू सचिन तेंडुलकर याने देखील भारतीय अॅथलिटना शुभेच्छा दिल्या आहेत. यात त्याने पॅराअॅथलिटना सपोर्ट करण्याचे आवाहन देखील केलं आहे.