मुंबई - भारतात कोरोनाचे संकट अधिक गडद होत आहे. देशात दररोज रेकॉर्डब्रेक कोरोना रूग्णाची भर पडत आहे. मोठ्या संख्येने रुग्णसंख्या वाढत असल्याने, रुग्णालयात बेड्सची कमतरता जाणवत आहे. दिल्ली असो की महाराष्ट्र अशी विदारक स्थिती प्रत्येक ठिकाणी आहे. भारतात ऑक्सिजन पुरवठ्याचा तुटवडा आहे. अशा संकटकालीन काळात पाकिस्तानचा माजी दिग्गज गोलंदाज शोएब अख्तरने भारतीय लोकांसाठी प्रार्थना केली आहे.
अख्तरने भारतातील लोकांबद्दल संवेदना व्यक्त केल्या आहेत. या संदर्भात त्याने ट्विट केले आहे. यात तो म्हणतो, 'भारतीय नागरिकांसाठी मी प्रार्थना करतो. मला आशा आहे की, लवकरच गोष्टी नियंत्रणात येतील. भारताचे सरकार हे संकट अधिक चांगल्या प्रकारे हाताळेल. आपण सर्व यात एकत्र आहोत.'