नवी दिल्ली :यूपी वॉरियर्सने डब्ल्यूपीएलमध्ये विजयाने सुरुवात केली आहे. गुजरात जायंट्सने यूपी वॉरियर्सला विजयासाठी 170 धावांचे लक्ष्य दिले होते. अ‍ॅलिसा हॅलीच्या संघाने हे लक्ष्य 19.5 षटकांत पूर्ण केले आणि सामना जिंकला. यूपी वॉरियर्सकडून ग्रेस हॅरिसने सर्वाधिक 59 धावा केल्या. तिला सामनावीर म्हणून निवडण्यात आले. ग्रेसनंतर महाराष्ट्राची खेळाडू किरण नवगिरे हिने सर्वाधिक धावा केल्या. किरणने 43 चेंडूत 53 धावा केल्या. तिने या खेळीत पाच चौकार आणि दोन षटकार मारले. ज्या बॅटने या धावा केल्या होत्या त्यावर 'MSD 07' लिहिले होते. यावरून किरण 'एम.एस. धोनी'चा डाय हार्ट फॅन असल्याचे दिसून येते.
किरण नवगिरे आहे धोनीची फॅन : किरण नवगिरेची फलंदाजी सोशल मीडियावर चांगलीच व्हायरल होत आहे. किरणने डब्ल्यूपीएलच्या पहिल्याच सामन्यात MSD 07 च्या बॅटने अर्धशतक झळकावले. किरणसाठी ही संस्मरणीय खेळी ठरली आहे. आंतरराष्ट्रीय क्रिकेटमधून निवृत्ती घेतलेला भारताचा माजी कर्णधार महेंद्रसिंग धोनी आयपीएल 16 मध्ये खेळताना दिसणार आहे. धोनी चेन्नई सुपर किंग्जमध्ये खेळतो. आजकाल तो खूप सराव करत आहे.