पुणे:इंडियन प्रीमियर लीगच्या ( Indian Premier League ) पंधराव्या हंगामातील 53 वा सामना शनिवारी लखनौ सुपर जायंट्स विरुद्ध कोलकाता नाइट रायडर्स ( Kolkata Knight Riders ) संघात खेळला गेला. या सामन्यात लखनौ सुपर जायंट्सने पुण्यातील एमसीए स्टेडियमवर कोलकाता नाईट रायडर्सवर 75 धावांनी मोठा विजय नोंदवला. केएल राहुलच्या ( Captain KL Rahul ) नेतृत्वाखालील लखनौ सुपरजायंट्ससाठी हा विजय खास होता. कारण ते गुणतालिकेत अव्वल स्थानावर पोहोचले आहेत. लखनौने 11 सामन्यांत 8 विजयांसह गुणतालिकेत अव्वल स्थान पटकावले आहे. त्यानंतर केएल राहुलने आपल्या संघाचे खास वैशिष्ट्ये सांगितले आहे.
पुण्यातील एमसीए स्टेडियमवर खेळल्या गेलेल्या सामन्यात लखनौ सुपरजायंट्सने ( Lucknow Super Giants ) प्रथम फलंदाजी करताना 20 षटकांत 7 गडी गमावून 176 धावा केल्या. यानंतर त्याच्या गोलंदाजांनी चमकदार कामगिरी करत केकेआरला 15व्या षटकात 101 धावांत गुंडाळले. लखनौच्या शानदार विजयानंतर कर्णधार केएल राहुलने आपल्या संघातील खेळाडूंचे तोंड भरुन कौतुक केले. त्याचबरोबर मोठा विजय मिळवल्यानंतर केएल राहुलने आपल्या संघाचे खास वैशिष्ट्ये सांगितले.