मुंबई:मंगळवारी (17 मे) मुंबई इंडियन्स विरुद्ध सनरायझर्स हैदराबाद ( Mumbai Indians vs Sunrisers Hyderabad ) संघात आयपीएलच्या पंधराव्या हंगामातील 65 वा सामना खेळला जाणार आहे. हा सामना मुंबईच्या वानखेडे स्टेडियमवर संध्याकाळी साडेसातला सुरु होणार आहे. या सामन्यात मुंबई इंडियन्स फक्त औपचारिकता पूर्ण करण्यासाठी मैदनात उतरेल. त्याचबरोबर हा सामना सनरायझर्स हैदराबाद संघाच्या दृष्टीने महत्वाचा आहे.
मुंबईने 12 पैकी तीन सामने जिंकले आहेत. त्याचबरोबर हा संघ प्लेऑफच्या शर्यतीतून सर्वात पहिल्यांदा बाहेर पडला आहे. दुसरीकडे सनरायझर्स हैदराबादने 12 पैकी पाच सामने जिंकले आहेत. तसेच संघ प्लेऑफमध्ये स्थान मिळवण्यासाठी संघर्ष करत आहे. रोहित शर्माचा ( Captain Rohit Sharma ) संघ शेवटपर्यंत चांगली कामगिरी करण्याचा प्रयत्न करेल, तर केन विल्यमसन आपल्या संघासाठी महत्त्वपूर्ण विजय मिळवण्यासाठी प्रयत्न करेल.
मुंबईसाठी या हंगामात मोजक्याच फलंदाजांनी प्रभावी कामगिरी केली असून युवा फलंदाज तिलक वर्माचे ( Batsman Tilak Verma ) नाव आघाडीवर आहे. टीम डेव्हिडनेही संघात पुन्हा समावेश झाल्यापासून शानदार खेळी खेळली आहे. गोलंदाजीत जसप्रीत बुमराह आणि डॅनियल सॅम्स यांनी चांगली कामगिरी केली आहे. हैदराबादसाठी राहुल त्रिपाठी आणि एडन मार्कराम यांनी सातत्यपूर्ण चांगली कामगिरी केली. त्याचबरोबर पॉवरप्लेमध्ये अभिषेक शर्मानेही उपयुक्त खेळी केली आहे. गोलंदाजीत उमरान मलिकवर सर्वांच्या नजरा असतील.