मुंबई:आयपीएलच्या पंधराव्या हंगामात दिल्ली कॅपिटल्स गुरुवारी आपला आठवा सामना कोलकाता नाईट रायडर्स विरुद्ध खेळणार आहे. या अगोदर दिल्ली कॅपिटल्ससाठी एक आनंदाची बातमी आहे की, त्यांचा अष्टपैलू खेळाडू मिचेल मार्श ( All-rounder Mitchell marsh ) आणि यष्टीरक्षक फलंदाज टिम सेफर्ट ( Wicketkeeper-batsman Tim Seifert ) कोरोनामधून बरे झाल्यानंतर सरावाला परतले आहेत. याबाबतची माहिती दिल्ली कॅपिटल्स फ्रँचायझीने बुधवारी दिली.
गेल्या आठवड्यात कोरोनाची लागण झालेले दोन्ही क्रिकेटपटू अनिवार्य आयसोलेशन पूर्ण करून सरावासाठी संघात दाखल झाले आहेत. कोलकाता नाईट रायडर्सविरुद्धच्या सामन्याच्या पूर्वसंध्येला मार्श आणि सेफर्ट दिल्ली कॅपिटल्सच्या सहकारी खेळाडूंसोबत सराव करताना दिसले.
दिल्ली कॅपिटल्सने ( Delhi Capitals ) या दोन क्रिकेटपटूंचा सत्रादरम्यान सराव करतानाचा एक फोटो शेअर केला आहे. फ्रेंचाइजीने सोशल मीडिया पोस्टमध्ये म्हटले, छान वाटत आहे. तुम्हाला प्रशिक्षणावर पाहून आनंद झाला. गेल्या सोमवारी ऑस्ट्रेलियन क्रिकेटर मार्शला कोरोनामुळे रुग्णालयात दाखल करावे लागले होते. त्यानंतर दोन दिवसांनी टीम सेफर्ट देखील पॉझिटिव्ह आला होता.