काय सांगता?, 'इतक्या' लोकांनी पाहिला यंदाच्या आयपीएलचा पहिला सामना

मुंबई इंडियन्स आणि चेन्नई सुपर किंग्ज यांच्यात आयपीएलच्या तेराव्या हंगामाचा सलामीचा सामना खेळला गेला. हा सामना २० कोटी लोकांनी पाहिला असल्याचे भारतीय क्रिकेट नियामक मंडळाचे (बीसीसीआय) सचिव जय शाह यांनी मंगळवारी सांगितले.

दुबई -यंदाच्या आयपीएलचा पहिला सामना २० कोटी लोकांनी पाहिला असल्याचे भारतीय क्रिकेट नियामक मंडळाचे (बीसीसीआय) सचिव जय शाह यांनी मंगळवारी सांगितले. गतविजेता संघ मुंबई इंडियन्स आणि चेन्नई सुपर किंग्ज यांच्यात हा सामना पार पडला. शहा यांच्या मते, इतर कोणत्याही देशातील कोणत्याही खेळाचा उद्घाटनाचा सामना पाहणारे हे सर्वाधिक लोक आहेत.

शनिवारी अबुधाबीच्या शेख झायेद स्टेडियमवर मुंबई इंडियन्स आणि चेन्नई सुपर किंग्ज यांच्यात आयपीएलच्या तेराव्या हंगामाचा सलामीचा सामना खेळला गेला, ज्यात महेंद्रसिंह धोनीच्या नेतृत्वात चेन्नई सुपर किंग्जने चार वेळच्या चॅम्पियन मुंबई इंडियन्सचा पाच गडी राखून पराभव केला.

"आयपीएलच्या उद्घाटन सामन्याने एक नवीन विक्रम स्थापित केला आहे. बीएआरसीच्या मते, हा सामना २० कोटी लोकांनी पाहिला. सलामीचा सामना पाहणार्‍या प्रेक्षकांची ही सर्वाधिक संख्या आहे", असे जय शाह यांनी ट्विटरवर लिहिले आहे.

कोरोनामुळे आयपीएल २०२० स्पर्धा यूएईच्या तीन ठिकाणी खेळली जात आहे. या स्पर्धेची अंतिम फेरी १० नोव्हेंबर रोजी होईल.