मुंबई- गेल्या दीड महिन्यांपासून क्रिकेटरसिकांसाठी मेजवाणी ठरलेल्या आयपीएलच्या या सीझनचा आज शेवटचा दिवस आहे. आज हैदराबादच्या राजीव गांधी आंतरराष्ट्रीय स्टेडियममध्ये मुंबई इंडियन्स आणि चेन्नई सुपर किंग्जमध्ये अंतिम सामना रंगणार आहे. जेतेपदासाठी चेन्नईला मुंबई इंडियन्सचा सामना करायचा आहे.
आयपीएलच्या इतिहासातील दोन यशस्वी संघ आज जेतेपदासाठी एकमेकांसमोर उभे ठाकणार आहेत. क्रिकेटप्रेमींची सामन्याबद्दलची उत्सुकता शिगेला पोहोचली आहे. मुंबईने आतापर्यंत रोहित शर्माच्या नेतृत्वाखाली चारपैकी तीन अंतिम फेरीचे सामने जिंकले आहेत. विशेष म्हणजे यांपैकी २०१३ आणि २०१५ चे सामने मुंबईने चेन्नईविरुद्ध खेळताना जिंकले आहेत.
आयपीएलच्या या अंतिम सामन्यावेळी प्रेक्षकांना अभिनेत्री कॅटरिना कैफ आणि सलमान खान यांनाही पाहाता येणार आहे. सामन्यादरम्यान सलमान आणि कॅटरिना आपल्या आगामी भारत चित्रपटाच्या प्रमोशनसाठी स्टूडिओमधून एक लाईव्ह सेगंमेंट घेणार असल्याचे म्हटले जात आहे.