चेन्नईICC ODI World Cup 2023 India Vs Australia :क्रिकेट विश्वचषकात आज भारतानं आपल्या मोहिमेची सुरुवात केली. चेन्नईच्या एमए चिदंबरम स्टेडियमवर भारतासमोर पाच वेळच्या विश्वविजेत्या ऑस्ट्रेलियाचं आव्हान होतं. ऑस्ट्रेलियाचा कर्णधार पॅट कमिन्सनं नाणेफेक जिंकून प्रथम फलंदाजीचा निर्णय घेतला. भारताविरुद्ध प्रथम फलंदाजी करताना ऑस्ट्रेलियानं ४९.३ षटकांत सर्वबाद १९९ धावा केल्या. भारतासमोर विजयासाठी २०० धावांचं आव्हान होतं. भारताकडून रविंद्र जडेजानं २८ धावा देत ३ विकेट घेतल्या. तर कुलदीप यादव आणि जसप्रीत बुमराहनं २-२ बळी घेतले. ऑस्ट्रेलियाकडून स्टीव स्मिथनं ७१ चेंडूत सर्वाधिक ४६ धावा केल्या.
भारताचा टॉप ऑर्डर ढेपाळला : लक्ष्याचा पाठलागा करताना भारताची सुरुवात अतिशय खराब झाली. सलामीवीर इशान किशन पहिल्याच चेंडूवर बाद झाला. त्याला स्टार्कनं ग्रीनच्या हाती झेलबाद केलं. कर्णधार रोहित शर्मा देखील भोपळा फोडू शकला नाही. त्याला हेजलवूडनं पायचित केलं. त्यानंतर चौथ्या क्रमाकांवर फलंदाजीला आलेला श्रेयस अय्यरही काही कमाल दाखवू शकला नाही. त्याला हेजलवूडनं शून्यावर वॉर्नरच्या हाती झेलबादं केलं.
राहुल-कोहलीनं भारताचा डाव सावरला :पाचव्या क्रमांकावर फलंदाजीला आलेल्या केएल राहुलनं विराट कोहलीच्या मदतीनं भारताचा डाव सावरला. या दोघांनी दमदार अर्धशतकं झळकावत भारताचा विजय सुनिश्चित केला. विराट कोहलीनं ११६ चेंडूत ६ चौकारांच्या मदतीनं ८५ धावांची खेळी केली. दुसरीकडे, केएल राहुलनं त्याला उत्तम साथ दिली. या दोघांनी चौथ्या विकेटसाठी २१५ चेंडूत १६५ धावांची भागिदारी केली. त्यांच्या या खेळीनं ऑस्ट्रेलियाच्या तोंडून विजयाचा घास हिरावला गेला. केएल राहुलनं ११५ चेंडूत ८ चौकार आणि २ षटकारांच्या मदतीनं नाबाद ९७ धावा केल्या. दुसऱ्या टोकावर हार्दिक पांड्या ११ धावांवर नाबाद राहिला.
स्टीव स्मीथच्या ४६ धावा :पाच धावांच्या स्कोअरवर ऑस्ट्रेलियाची पहिली विकेट पडली. जसप्रीत बुमराहनं मिचेल मार्शला विराट कोहलीच्या हाती झेलबाद केलं. मार्शनं सहा चेंडूंचा सामना केला, पण त्याला खातंही उघडता आलं नाही. त्यानंतर आलेल्या स्टीव स्मीथनं डेव्हिड वॉर्नरसोबत डावाला आकार दिला. मात्र फिरकीपटू कुलदीप यादवनं वॉर्नरचा अडथळा दूर केला. यादवनं वॉर्नरला ४१ धावांवर तंबूत पाठवलं. त्यानं ५२ चेंडूंचा सामना केला. त्यानंतर फिरकीपटू रविंद्र जडेजाचा कहर पाहायला मिळाला. जडेजानं आधी स्मिथला ४६ धावांवर बोल्ड केलं. त्यानंतर लाबुशेनला २७ आणि ॲलेक्स कॅरीला ० धावांवर तंबूत पाठवलं. कुलदीपनं मॅक्सवेलला १५ धावांवर बोल्ड केलं.
शुभमन गिलच्या जागी इशान किशन : या वर्ल्डकपसाठी भारत आणि ऑस्ट्रेलिया हे दोन्ही संघ फेव्हरेट आहेत. टीम इंडियानं गेल्या तीन विश्वचषकांमध्ये विजयानं आपल्या मोहिमेची सुरुवात केली. अशा परिस्थितीत आजही भारताची सुरुवात विजयानं व्हावी अशी क्रिकेटप्रेमींची अपेक्षा आहे. मात्र या सामन्यापूर्वी भारताला मोठा धक्का बसला. फॉर्ममध्ये असलेला टीम इंडियाचा सलामीवीर शुभमन गिल आजारी आहे. त्यामुळे ऑस्ट्रेलियाविरुद्धच्या पहिल्या सामन्यात तो खेळू शकणार नाही. त्याच्या अनुपस्थितीत युवा इशान किशन टीममध्ये संधी मिळाली आहे.