रोहित शर्मा म्हणतो, "मी जर पाकिस्तानचा कोच झालो तर...."

पाकिस्तान विरुध्दच्या सामन्यात भारताचा आघाडीचा फलंदाज रोहित शर्माने खणखणीत शतक झळकावत ११३ चेंडूत १४० धावांची खेळी केली.

नवी दिल्ली - पाकिस्तान विरुध्दच्या सामन्यात भारताचा आघाडीचा फलंदाज रोहित शर्माने खणखणीत शतक झळकावत ११३ चेंडूत १४० धावांची खेळी केली. या सामन्यामध्ये भारताने पाकवर ८९ धावांनी विजय मिळवला. सामना संपल्यानंतर झालेल्या पत्रकार परिषदेत रोहितने पाकिस्तानच्या एका पत्रकाराने विचारलेल्या प्रश्नाला गमतीशीर उत्तर दिले.

या पत्रकाराने प्रथम रोहितने केलेल्या जबरदस्त कामगिरीचे कौतुक केले. त्यानंतर ‘सध्या संघर्ष करणाऱ्या पाकिस्तानच्या फलंदाजांना तू काय सल्ला देशील?’ असा प्रश्न विचारला.

यावर रोहितने ‘मी जर पाकिस्तानचा कोच झालो तर सांगेन. आत्ता मी हे कसे सांगणार.’ असे मजेशीर उत्तर दिले. हे उत्तर ऐकताच तिथे असणाऱ्यांचा हशा पिकला.

या सामन्यामध्ये पाकिस्तानने नाणेफेक जिंकून प्रथम गोलंदाजीचा निर्णय घेतला. तेव्हा सलामीला के. एल. राहुलसोबत उतरत रोहित शर्माने खणखणीत १४० धावांची खेळी केली. रोहितच्या या खेळीने पाकिस्तानच्या गोलंदाजांना 'सळो की पळो' करुन सोडले.