इंग्लंडच्या विजय पाहून हे दिग्गज म्हणाले, 'हे काही बरोबर नाही'

इंग्लंडने चौकार आणि षटकाराच्या नियमानुसार फायनल सामन्यात विजय मिळवला.

लॉर्डस -अतिशय रंगतदार आणि शेवटच्या क्षणापर्यंत श्वास रोखून धरायला लावणाऱ्या विश्वकरंडक स्पर्धेच्या फायनल सामन्यात इंग्लडने बाजी मारली. न्यूझीलंडने तोडीस-तोड खेळ केला मात्र, चौकार आणि षटकाराच्या नियमानुसार इंग्लंडने विजय मिळवला. या विजयामुळे जगभरात इंग्लंडचे कौतूक होत आहे. तर, काही खेळाडूंनी याच विजयाबाबत प्रश्नचिन्ह उठवले आहेत.

भारताचे माजी क्रिकेटपटू गौतम गंभीर, युवराज सिंग आणि आकाश चोप्रा यांनी आयसीसीच्या चौकार आणि षटकाराच्या नियमाला फटकारले आहे. गंभीरने या आयसीसीला ट्विट करत म्हटले आहे, 'अंतिम सामन्याचा विजेता ठरवण्याबद्दल असलेला आयसीसीचा चौकार आणि षटकाराचा नियम अगदी वाईट आहे. सामना बरोबरीत सुटायला हवा होता. मला इंग्लंड आणि न्यूझीलंड या दोन्ही संघाना शुभेच्छा द्यायच्या आहेत. दोन्ही संघ विजेते आहेत.'

क्रिकेट समालोचक आकाश चोप्राने म्हटले आहे, 'न्यूझीलंडने दोन अंतिम सामने गमावले आहेत. दुसरा सामना हा कमी चौकार लगावल्यामुळे गमावला आहे. न्यूझीलंडसाठी वाईट वाटणार नाही असे होणारच नाही. तुम्ही मने जिंकली.'

भारताचा माजी स्फोटक फलंदाज युवीलाही हा नियम मान्य नाही. त्याने म्हटले आहे, 'मी या नियमाशी सहमत नाही.पण नियम हा नियम असतो. विश्वकरंडक स्पर्धा जिंकल्याबद्दल इंग्लंडला शुभेच्छा. माझी सहानुभूती न्यूझीलंडसोबत आहे. जे शेवटपर्यंत लढले. ऐतिहासिक सामना झाला.'