सिडनी -भारताचा माजी कर्णधार महेंद्रसिंह धोनीचे जगभरात चाहते आहेत. आंतरराष्ट्रीय क्रिकेटमधून निवृत्ती घेतल्यानंतरही त्याचे चाहते कमी झालेले नाहीत. सध्या भारत आणि ऑस्ट्रेलिया यांच्यात सुरू असलेल्या मालिकेतही धोनीप्रेमी दिसून आले. या चाहत्यांनी मैदानात आणलेले धोनीसाठीचे बॅनर पाहून विराट कोहलीनेही त्यांना खास प्रतिक्रिया दिली.
हेही वाचा -धवनचा धोनीला धोबीपछाड, मोठ्या विक्रमात टाकले मागे
सिडनी क्रिकेट मैदानावर ऑस्ट्रेलिया विरुद्ध भारत यांच्यात खेळल्या गेलेल्या दुसर्‍या टी-२० सामन्यात ही घटना पाहायला मिळाली. ऑस्ट्रेलिया संघ फलंदाजी करताना विराट सीमारेषेवर क्षेत्ररक्षण करत होता. त्यावेळी काही भारतीय चाहत्यांनी भारताचा धोनीची आठवण काढली. अनेक चाहत्यांनी हातामध्ये ‘वुई मिस यू धोनी’ अशा प्रकारचे पोस्टर घेतले होते. हे पोस्टर पाहून विराटनेही 'मी टू' असा इशारा करत चाहत्यांची मने जिंकली.