दुबई - इंग्लंडविरुद्धच्या टी-२० मालिकेत कर्णधार विराट कोहलीने सलग दोन अर्धशतक झळकावली. या कामगिरीचे विराटला बक्षिस मिळाले आहे. आयसीसी टी-२० फलंदाजांच्या यादीत विराटच्या क्रमवारीत सुधारणा झाली आहे.
आयसीसीने ताजी टी-२० क्रमवारी झाली केली आहे. यात विराट कोहलीला एका स्थानाचा फायदा झाला आहे. तो सहाव्या स्थानावरून पाचव्या स्थानी पोहोचला आहे.
इंग्लंडविरुद्ध विराटचे दोन अर्धशतक -
अहमदाबादच्या नरेंद्र मोदी स्टेडियममध्ये भारत-इंग्लंड यांच्यात ५ सामन्याची टी-२० मालिका खेळवण्यात येत आहे. यातील दुसऱ्या सामन्यात विराटने नाबाद ७३ धावांची खेळी साकारली होती. त्याच्या या खेळीमुळे भारताने हा सामना ७ गडी राखून जिंकला. यानंतर त्याने तिसऱ्या टी-२० सामन्यात नाबाद ७७ धावा केल्या. पण या सामन्यात भारताचा पराभव झाला.
राहुलला गचाळ कामगिरीचा फटका -
इंग्लंडविरुद्धच्या मालिकेत के एल राहुल फलंदाजीत अपयशी ठरला. त्याला तीन सामन्यात अनुक्रमे १, ०, ० धावा करता आल्या. या गचाळ कामगिरीचा फटका राहुलला क्रमवारीत बसला आहे. त्याची एका क्रमाने घसरण झाली असून तो चौथ्या स्थानी घसरला आहे. पाकिस्तानच्या बाबर आझमने त्याला मागे टाकले.
बटलर-बेअरस्टोची भरारी -
जोस बटलरने तिसऱ्या टी-२० सामन्यात नाबाद ८३ धावांची खेळी साकारली. या कामगिरीमुळे त्याची क्रमवारीत सुधारणा झाल्याचे पाहायला मिळत आहे. बटलर ५ स्थानाच्या फायद्यासह १९व्या स्थानी पोहोचला आहे. दुसरीकडे याच सामन्यात नाबाद ४० धावांची खेळी करणारा बेअरस्टो २ स्थानाच्या सुधारणेसह १४व्या स्थानी पोहोचला आहे. या क्रमवारीत ८९४ गुणांसह डेविड मलान पहिल्या स्थानी आहे.
हेही वाचा -Ind Vs Eng ३rd T-२० : इंग्लंडचा भारतावर ८ गडी राखून विजय, बटलरची वादळी खेळी
हेही वाचा -इशान किशनच्या आई-वडिलांशी 'ईटीव्ही भारत'ची खास बातचित
