दुबई - सूर्यकुमार यादवने सातत्याने चांगली कामगिरी करून देखील त्याला भारतीय संघात अद्याप स्थान मिळालेले नाही. भारतीय संघाच्या निवडकर्त्यांनी सूर्यकुमारकडे दुर्लक्ष केले असल्याचा आरोप अनेक दिग्गज खेळाडूंनी केला आहे. अशात मुंबई इंडियन्सचा अनुभवी खेळाडू केरॉन पोलार्डने देखील सूर्यकुमारला त्याच्या कामगिरीचे बक्षीस मिळायला हवे, असे म्हटलं आहे.
यंदाच्या ऑस्ट्रेलिया दौऱ्यात सूर्यकुमारला संधी मिळेल, असे वाटत होते. परंतू तिकडेही त्याच्या पदरी निराशाच आली. ऑस्ट्रेलिया दौऱ्यासाठी संघांची निवड घोषित झाल्यानंतर, संघात स्थान न मिळालेल्या सूर्यकुमारने बंगळुरूविरुद्ध ७९ धावांची नाबाद खेळी करत मुंबईला एकहाती विजय मिळवून दिला. या सामन्यानंतर बोलताना पोलार्डने देखील सूर्यकुमारची निवड ऑस्ट्रेलिया दौऱ्यासाठी न करण्यात आल्याने आश्चर्य व्यक्त केले.
काय म्हणाला पोलार्ड -
सामन्यानंतर बोलताना पोलार्ड म्हणाला की, भारतीय संघात स्थान न मिळाल्यामुळे सूर्यकुमार नक्कीच दु:खी असेल. देशांतर्गत, आयपीएल आणि भारतीय अ संघाकडून शानदार प्रदर्शन केल्यानंतरही सूर्यकुमारची भारतीय संघात निवड झालेली नाही.