चेन्नई - आयपीएलच्या चौदाव्या हंगामात कोलकाता नाईट रायडर्स संघाने विजयी सुरूवात केली. रविवारी पार पडलेल्या सामन्यात कोलकाताने सनरायजर्स हैदराबाद संघाचा १० धावांनी पराभव केला. आयपीएलमधील कोलकाताचा हा १०० वा विजय आहे. या सामन्यानंतर कोलकाता संघाचा मालक आणि बॉलिवूड अभिनेता शाहरुख खानने ट्वीट करत आपल्या संघाचे अभिनंदन करत उत्साह वाढवला.
आयपीएलमधील १०० वा विजय झाला. हे आमच्यासाठी चांगले आहे. वेल डन बॉईज.. खरेतर, तुम्ही सर्वच जण खूप चांगले खेळलात, अशा आशयाचे ट्विट शाहरूखने केले आहे. यात त्याने प्रसिद्ध कृष्णा, दिनेश कार्तिक, नितीश राणा, आंद्रे रसेल, हरभजन सिंग, पॅट कमिन्स, शाकिब अल हसन यांना टॅग केलं आहे. तर राहुलच्या नावाचा हॅशटॅग वापरला आहे.
कोलकाताने नितीश राणा (८०), राहुल त्रिपाठी (५३) आणि दिनेश कार्तिकच्या झटपट २२ धावा याच्या जोरावर १८८ धावांचे आव्हान हैदराबादपुढे ठेवले होते. या आव्हानाचा पाठलाग करताना हैदराबादचा संघाची सुरूवात खराब झाली. त्यांची सलामीवीर जोडी १० धावांतच तंबूत परतली.