मुंबई - लॉकडाऊनमुळे खेळाडू मागील अडीच महिन्यांपासून आपापल्या घरीच आहेत. अशा परिस्थितीमध्ये घरात बसून कंटाळलेले खेळाडू एकमेकांना घरातच चॅलेंज देत आहेत. भारताचा माजी अष्टपैलू खेळाडू युवराज सिंह याने मास्टर ब्लास्टर सचिन तेंडुलकरला एक चॅलेज दिले आहे. त्याने सचिनला मैदानाच्याऐवजी स्वयंपाकघरात शतक ठोकून दाखव, असे चॅलेंज दिले. स्वयंपाकघरात पोळी लाटण्यासाठी वापरण्यात येणारे लाटणे आणि चेंडू याच्या सहाय्याने १०० वेळा चेंडू 'कीप इट अप' चॅलेंजप्रमाणे उडवून दाखवायचे, असे हे चॅलेंज आहे.
युवीच्या या चॅलेंजला सचिनने दमदार उत्तर दिले आहे. तो म्हणतो, 'मी दिलेल्या आधीच्या चॅलेंजचे उत्तर तू खूप मस्त दिले आहेस. विशेष म्हणजे, त्या चॅलेंजसाठी तू स्वयंपाकघरात जाऊन लाटण्याने चेंडू हवेत उडवलास. पण मित्रा, जेव्हा कोणी स्वयंपाकघरात असतो आणि त्याच्या हातात लाटणे असते. तेव्हा त्याने लोकांना पराठे खायला घालावेत. माझ्याकडे दही आणि लोणचे आहे, फक्त डिश रिकामी आहे. लवकर मला पराठे पाठवून दे.'