...आणि पूरग्रस्तांच्या मदतीसाठी 'देव'ही धावला

रहाणेने आपल्या ट्विटर अकाऊंटवरुन एक मराठीमध्ये पोस्ट शेअर केली होती.आता सचिननेही एक ट्विट केले आहे.

मुंबई - यंदा झालेल्या सांगली आणि कोल्हापूरच्या पूरसंकटाने अनेक लोकांचे जीवन उद्ध्वस्त झाले. या संकटावर मात करण्यासाठी अनेक लोकांनी आपल्या परीने मदतीचा हात पुढे केला. काही दिवसांपूर्वी टीम इंडियाचा फलंदाज अंजिक्य रहाणेनेदेखील मदतीचे आवाहन केले. आता क्रिकेटच्या देवानेदेखील या संकटात सापडलेल्यांना मदत करण्याचे आवाहन केले आहे.

रहाणेने आपल्या ट्विटर अकाऊंटवरुन एक मराठीमध्ये पोस्ट शेअर केली होती. त्यामध्ये त्याने 'मी मदत करून माझा खारीचा वाटा उचलतो आहे, आपणसुद्धा जमेल तशी मदत नक्की करा' असे म्हटले होते. आता सचिननेही एक ट्विट केले आहे.

सचिनने आपल्या ट्विटमध्ये म्हटले, 'भारतातील अनेक भागांना पुराचा फटका बसला आहे. पण, आता परिस्थिती हळुहळु सुधारत आहे. आणि तिथे असणाऱ्या लोकांना मदतीची गरज आहे. मी माझ्याकडून पंतप्रधान मदतनिधीमार्फत मदत दिली आहे. त्याबरोबर मी तुम्हालाही मदतीसाठी आवाहन करत आहे.'

कोल्हापूर व सांगली या जिल्ह्यांमध्ये पुराची भयंकर स्थिती निर्माण झाली. या संकटात अडकलेल्या लोकांना सुरक्षितस्थळी हलविण्यासाठी प्रशासनाचे युद्धपातळीवर प्रयत्न सुरू आहेत. आतापर्यंत राज्यातील पूरग्रस्त भागातील ४ लाख ६६ हजार ९६३ नागरिकांना सुरक्षितस्थळी हलविण्यात आले आहे.