माउंट माउंगानुई - न्यूझीलंडविरुद्धच्या पहिल्या कसोटी सामन्यात पाकिस्तान संघावर फॉलोऑनचे सावट होते. तेव्हा पाकच्या मोहम्मद रिजवान आणि फहिम अशरफ या दोघांनी चिवट खेळी करत न्यूझीलंडचे मनसुबे उधळून लावले. पाकचा पहिला डाव तिसऱ्या दिवसाचा खेळ, काही षटके शिल्लक असताना २३९ धावांत आटोपला. न्यूझीलंडने पहिल्या डावात ४३१ धावा केल्या आहेत. यामुळे त्यांच्याकडे १९२ धावांची मजबूत आघाडी आहे.
पाकची अवस्था एकवेळ ६ बाद ८० अशी झाली होती. तेव्हा रिजवान आणि अशरफ यांनी भागिदारी रचत पाकिस्तानला फॉलोऑनपासून वाचवले. रिजवानने १४२ चेंडूचा सामना करताना आठ चौकारासह ७१ धावा केल्या. तर अशरफने १३४ चेंडूत १५ चौकार आणि १ षटकारासह ९१ धावांची खेळी केली. दोघे बाद झाल्यानंतर पाकिस्तानच्या तळाच्या फलंदाजांनी नांगी टाकली आणि पाकचा संघ २३९ धावांवर आटोपला.